{"kind":"section","lang":"la","language":"Latin","title":"Culex 1-47","citation":"Appendix Vergiliana, Culex 1-47","ref":"1","level":null,"urn":null,"url":"https://interlinea.aeterna-institute.org/library/latin/appendix-vergiliana/culex/1","api":"https://interlinea.aeterna-institute.org/api/v1/library/latin/appendix-vergiliana/culex/1","markdown":"https://interlinea.aeterna-institute.org/library/latin/appendix-vergiliana/culex/1.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Culex","url":"https://interlinea.aeterna-institute.org/library/latin/appendix-vergiliana/culex","urn":"urn:cts:latinLit:phi0692.phi003"},"verse":true,"words":306,"text":"Lusimus, Octaui, gracili modulante Thalia\nAtque ut araneoli tenuem formauimus orsum;\nLusimus: haec propter culicis sint carmina docta,\nOmnis et historiae per ludum consonet ordo\nNotitiaeque ducum uoces, licet inuidus adsit.\nQuisquis erit culpare iocos musamque paratus,\nPondere uel culicis leuior famaque feretur.\nPosterius grauiore sono tibi musa loquetur\nNostra, dabunt cum securos mihi tempora fructus,\nVt tibi digna tuo poliantur carmina sensu.\nLatonae magnique Iouis decus, aurea proles,\nPhoebus erit nostri princeps et carminis auctor\nEt recinente lyra fautor, siue educat illum\nArna Chimaereo Xanthi perfusa liquore\nSeu decus Asteriae seu qua Parnasia rupes\nHinc atque hinc patula praepandit cornua fronte\nCastaliaeque sonans liquido pede labitur unda.\nQuare, Pierii laticis decus, ite, sorores\nNaides, et celebrate deum ludente chorea.\nEt tu, sancta Pales, ad quam uentura recurrunt\nAgrestum bona fetura, sit cura tenentis\nAerios nemorum cultus siluasque uirentes:\nTe cultrice uagus saltus feror inter et antra.\nEt tu, cui meritis oritur fiducia chartis,\nOctaui uenerande, meis adlabere coeptis,\nSancte puer, tibi namque canit non pagina bellum\nTriste Iouis ponitque [canit non pagina bellum]\nPhlegra, Giganteo sparsa est quae sanguine tellus,\nNec Centaureos Lapithas compellit in enses;\nVrit Erichthonias Oriens non ignibus arces;\nNon perfossus Athos nec magno uincula ponto\nIacta meo quaerent iam sera uolumine famam,\nNon Hellespontus pedibus pulsatus equorum,\nGraecia cum timuit uenientis undique Persas;\nMollia sed tenui decurrens carmina uersu\nViribus apta suis Phoebo duce ludere gaudet.\nHoc tibi, sancte puer; memorabilis et tibi certet\nGloria perpetuum lucens mansura per aeuum;\nEt tibi sede pia maneat locus, et tibi sospes\nDebita felices memoretur uita per annos,\nGrata bonis lucens. sed nos ad coepta feramur.\nIgneus aetherias iam sol penetrarat in arces\nCandidaque aurato quatiebat lumina curru,\nCrinibus et roseis tenebras Aurora fugarat:\nPropulit e stabulis ad pabula laeta capellas\nPastor et excelsi montis iuga summa petiuit,\nLurida qua patulos uelabant gramina colles.","prev":null,"next":{"citation":"Culex 48-93","label":"Lines 48-93","url":"https://interlinea.aeterna-institute.org/library/latin/appendix-vergiliana/culex/48","api":"https://interlinea.aeterna-institute.org/api/v1/library/latin/appendix-vergiliana/culex/48"},"credit":{"text":"Appendix Vergiliana, Culex. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Ccule%7C001","quality":"proofread"}}