{"kind":"section","lang":"la","language":"Latin","title":"Culex 140-197","citation":"Appendix Vergiliana, Culex 140-197","ref":"140","level":null,"urn":null,"url":"https://interlinea.aeterna-institute.org/library/latin/appendix-vergiliana/culex/140","api":"https://interlinea.aeterna-institute.org/api/v1/library/latin/appendix-vergiliana/culex/140","markdown":"https://interlinea.aeterna-institute.org/library/latin/appendix-vergiliana/culex/140.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Culex","url":"https://interlinea.aeterna-institute.org/library/latin/appendix-vergiliana/culex","urn":"urn:cts:latinLit:phi0692.phi003"},"verse":true,"words":354,"text":"Ilicis et nigrae species et fleta cupressus\nVmbrosaeque manent fagus hederaeque ligantes\nBracchia, fraternos plangat ne populus ictus,\nIpsaeque escendunt ad summa cacumina lentae\nPinguntque aureolos uiridi pallore corymbos;\nQuis aderat ueteris myrtus non nescia fati.\nAt uolucres patulis residentes dulcia ramis\nCarmina per uarios edunt resonantia cantus.\nHic suberat gelidis manans e fontibus unda,\nQuae leuibus placidum riuis sonat acta liquorem;\nEt quaqua geminas auium uox obstrepit aures,\nHac querulae referunt uoces quis nantia limo\nCorpora lympha fouet; sonitus alit aeris echo\nArgutis et cuncta fremunt ardore cicadis.\nAt circa passim fessae cubuere capellae\nExcelsis subter dumis, quos leniter adflans\nAura susurrantis poscit confundere uenti.\nPastor ut ad fontem densa requieuit in umbra,\nMitem concepit proiectus membra soporem,\nAnxius insidiis nullis, sed lentus in herbis\nSecuro pressos somno mandauerat artus.\nStratus humi dulcem capiebat corde quietem,\nNi Fors incertos iussisset ducere casus.\nNam solitum uoluens ad tempus tractibus isdem\nImmanis uario maculatus corpore serpens,\nMersus ut in limo magno subsideret aestu,\nObuia uibranti carpens, grauis aere, lingua\nSquamosos late torquebat motibus orbes:\ntollebant aurae uenientis ad omnia uirus.\nIam magis atque magis corpus reuolubile uoluens\nAttollit nitidis pectus fulgoribus *et se*\nSublimi ceruice caput, cui crista superne\nEdita purpureo lucens maculatur amictu\nAspectuque micant flammarum lumina toruo.\nMetabat sese circum loca, cum uidet ingens\nAduersum recubare ducem gregis: acrior instat\nLumina diffundens intendere et obuia toruus\nSaepius arripiens infringere, quod sua quisquam\nAd uada uenisset. naturae comparat arma:\nArdet mente, furit stridoribus, intonat ore,\nFlexibus euersis torquentur corporis orbes,\nManant sanguineae per tractus undique guttae,\nSpiritibus rumpit fauces. cui cuncta parantur\nParuulus hunc prior umoris conterret alumnus\nEt mortem uitare monet per acumina; namque,\nQua diducta genas pandebant lumina gemmis,\nHac senioris erat naturae pupula telo\nIcta leui, cum prosiluit furibundus et illum\nObtritum morti misit; cui dissitus omnis\nSpiritus excessit sensus. tum torua tenentem\nLumina respexit serpentem comminus; inde\nImpiger, exanimis, uix compos mente refugit\nEt ualidum dextra detraxit ab arbore truncum\n(Qui casus sociarit opem numenue deorum\nProdere sit dubium; ualuit sed uincere talis\nHorrida squamosi uoluentia membra draconis)\nAtque reluctantis crebris foedeque petentis\nIctibus ossa ferit, cingunt qua tempora cristam;","prev":{"citation":"Culex 94-139","label":"Lines 94-139","url":"https://interlinea.aeterna-institute.org/library/latin/appendix-vergiliana/culex/94","api":"https://interlinea.aeterna-institute.org/api/v1/library/latin/appendix-vergiliana/culex/94"},"next":{"citation":"Culex 198-242","label":"Lines 198-242","url":"https://interlinea.aeterna-institute.org/library/latin/appendix-vergiliana/culex/198","api":"https://interlinea.aeterna-institute.org/api/v1/library/latin/appendix-vergiliana/culex/198"},"credit":{"text":"Appendix Vergiliana, Culex. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Ccule%7C001","quality":"proofread"}}