{"kind":"section","lang":"la","language":"Latin","title":"Culex 243-288","citation":"Appendix Vergiliana, Culex 243-288","ref":"243","level":null,"urn":null,"url":"https://interlinea.aeterna-institute.org/library/latin/appendix-vergiliana/culex/243","api":"https://interlinea.aeterna-institute.org/api/v1/library/latin/appendix-vergiliana/culex/243","markdown":"https://interlinea.aeterna-institute.org/library/latin/appendix-vergiliana/culex/243.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Culex","url":"https://interlinea.aeterna-institute.org/library/latin/appendix-vergiliana/culex","urn":"urn:cts:latinLit:phi0692.phi003"},"verse":true,"words":285,"text":"Quid, saxum procul aduerso qui monte reuoluit,\nContempsisse dolor quem numina uincit acerbans\nOtia quaerentem frustra sibi? ite, puellae,\nIte, quibus taedas accendi tristis Erinys:\nSicut Hymen praefata, dedit conubia mortis.\nAtque alias alio densas super agmine turmas!\nImpietate fera uaecordem Colchida matrem\nAnxia sollicitis meditantem uulnera natis;\nIam Pandionia miserandas prole puellas,\nQuarum uox Ityn edit Ityn, quo Bistonius rex\nOrbus epops maeret, uolucres euectus in auras.\nAt discordantes Cadmeo semine fratres\nIam truculenta ferunt infestaque lumina corpus\nAlter in alterius, iamque auersatus uterque,\nImpia germani manat quod sanguine dextra.\nEheu mutandus numquam labor! auferor ultra\nIn diuersa magis, distantia nomina cerno:\nElysiam tranandus agor delatus ad undam.\nObuia Persephone comites heroidas urget\nAduersas praeferre faces. Alcestis ab omni\nInuiolata uacat cura, quod saeua mariti\nIn Chalcodoniis Admeti fata morata est.\nEcce Ithaci coniunx semper decus, Icariotis,\nFemineum concepta decus, manet et procul illa\nTurba ferox iuuenum telis confixa procorum.\nQuid misera Eurydice tanto maerore recessit,\nPoenaque respectus et nunc in te manet, Orpheu?\nAudax ille quidem, mitem qui Cerberon umquam\nCredidit aut ulli Ditis placabile numen,\nNec timuit Phlegethonta furentem ardentibus undis\nNec maesta obtenta Ditis ferrugine regna\nDefossasque domos ac Tartara nocte cruenta\nObsita nec faciles Ditis sine iudice sedes,\nIudice, qui uitae post mortem uindicat acta.\nSed fortuna ualens audacem fecerat ante:\nIam rapidi steterant amnes et turba ferarum\nBlanda uoce sequax regionem insederat *orphei;\nIamque imam uiridi radicem mouerat alte\nQuercus humo [steterant amnes] siluaeque sonorae\nSponte sua cantus rapiebant cortice auara.\nLabentis biiuges etiam per sidera Luna\nPressit equos et tu currentis, menstrua uirgo,\nAuditura lyram tenuisti nocte relicta.\nHaec eadem potuit, Ditis, te uincere, coniunx,\nEurydicenque ultro ducendam reddere: non fas,\nNon erat in uitam diuae exorabile mortis.","prev":{"citation":"Culex 198-242","label":"Lines 198-242","url":"https://interlinea.aeterna-institute.org/library/latin/appendix-vergiliana/culex/198","api":"https://interlinea.aeterna-institute.org/api/v1/library/latin/appendix-vergiliana/culex/198"},"next":{"citation":"Culex 289-333","label":"Lines 289-333","url":"https://interlinea.aeterna-institute.org/library/latin/appendix-vergiliana/culex/289","api":"https://interlinea.aeterna-institute.org/api/v1/library/latin/appendix-vergiliana/culex/289"},"credit":{"text":"Appendix Vergiliana, Culex. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Ccule%7C001","quality":"proofread"}}