{"kind":"section","lang":"la","language":"Latin","title":"Culex 289-333","citation":"Appendix Vergiliana, Culex 289-333","ref":"289","level":null,"urn":null,"url":"https://interlinea.aeterna-institute.org/library/latin/appendix-vergiliana/culex/289","api":"https://interlinea.aeterna-institute.org/api/v1/library/latin/appendix-vergiliana/culex/289","markdown":"https://interlinea.aeterna-institute.org/library/latin/appendix-vergiliana/culex/289.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Culex","url":"https://interlinea.aeterna-institute.org/library/latin/appendix-vergiliana/culex","urn":"urn:cts:latinLit:phi0692.phi003"},"verse":true,"words":282,"text":"Illa quidem nimium manes experta seueros\nPraeceptum signabat iter nec rettulit intus\nLumina nec diuae corrupit munera lingua;\nSed tu crudelis, crudelis tu magis, Orpheu;\nOscula cara petens rupisti iussa deorum.\nDignus amor uenia; gratum, si Tartara nossent,\nPeccatum: meminisse graue est. uos sede piorum,\nVos manet heroum contra manus. hic et uterque\nAeacides (Peleus namque et Telamonia uirtus\nPer secura patris laetantur numina, quorum\nConubiis Venus et Virtus iniunxit honorem;\nHunc rapuit *ferit*, ast illum Nereis amauit):\nAssidet hac iuuenis: sociat te gloria sortis,\nAlter *in excisum* referens a nauibus ignes\nArgolicis Phrygios torua feritate repulsos\n(O quis non referat talis diuortia belli,\nQuae Troiae uidere uiri uidereque Grai,\nTeucria cum magno manaret sanguine tellus\nEt Simois Xanthique liquor, Sigeaque praeter\nLitora cum Troas saeui ducis Hectoris ira\n*Videre* in classes inimica mente Pelasgas\nVulnera tela neces ignes inferre paratos?\nIpsa iugis namque Ida potens, feritatis et ipsa\nIda faces altrix cupidis praebebat alumnis,\nOmnis ut in cineres Rhoetei litoris ora\nClassibus ambustis flamma lacrimante daretur.\nHinc erat oppositus contra Telamonius heros\nObiectoque dabat clipeo certamina, et illinc\nHector erat, Troiae summum decus, acer uterque.\nFluminibus ueluti fragor *et libet in se...\nTegminibus telisque super [Sigeaque praeter]\nEriperet reditus, alter Vulcania ferro\nVulnera protectus depellere nauibus instat).\nHos erat Aeacides uultu laetatus honores\nDardaniaeque alter fuso quod sanguine campis\nHectoreo uictor lustrauit corpore Troiam;\nRursus acerba fremunt, Paris hunc quod letat et huius\n*arma* dolis Ithaci uirtus quod concidit icta.\nHuic gerit auersos proles Laertia uultus,\nEt iam Strymonii Rhesi uictorque Dolonis\nPallade iam laetatur ouans rursusque tremescit\nIam Ciconas iamque horret atrox *lestrigone...;\nIllum Scylla rapax, canibus succincta Molossis,\nAetnaeusque Cyclops, illum metuenda Charybdis\nPallentesque lacus et squalida Tartara terrent.","prev":{"citation":"Culex 243-288","label":"Lines 243-288","url":"https://interlinea.aeterna-institute.org/library/latin/appendix-vergiliana/culex/243","api":"https://interlinea.aeterna-institute.org/api/v1/library/latin/appendix-vergiliana/culex/243"},"next":{"citation":"Culex 334-378","label":"Lines 334-378","url":"https://interlinea.aeterna-institute.org/library/latin/appendix-vergiliana/culex/334","api":"https://interlinea.aeterna-institute.org/api/v1/library/latin/appendix-vergiliana/culex/334"},"credit":{"text":"Appendix Vergiliana, Culex. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Ccule%7C001","quality":"proofread"}}