{"kind":"section","lang":"la","language":"Latin","title":"Culex 334-378","citation":"Appendix Vergiliana, Culex 334-378","ref":"334","level":null,"urn":null,"url":"https://interlinea.aeterna-institute.org/library/latin/appendix-vergiliana/culex/334","api":"https://interlinea.aeterna-institute.org/api/v1/library/latin/appendix-vergiliana/culex/334","markdown":"https://interlinea.aeterna-institute.org/library/latin/appendix-vergiliana/culex/334.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Culex","url":"https://interlinea.aeterna-institute.org/library/latin/appendix-vergiliana/culex","urn":"urn:cts:latinLit:phi0692.phi003"},"verse":true,"words":291,"text":"Hic et Tantaleae generamen prolis Atrides\nAssidet, Argiuum lumen, quo flamma regente\nDoris Erichthonias prostrauit funditus arces.\nReddidit heu Graius poenas tibi, Troia, ruenti,\nHellespontiacis obiturus reddidit undis.\nIlla uices hominum testata est copia quondam,\nNe quisquam propriae fortunae munere diues\nIret ineuectus caelum super; omne propinquo\nFrangitur inuidiae telo decus. ibat in altum\nVis Argea petens patriam ditataque praeda\nArcis Erichthoniae; comes huic erat aura secunda\nPer placidum cursu pelagus; Nereis ad undas\nSigna dabat, pars inflexis super acta carinis,\nCum seu caelesti fato seu sideris ortu\nVndique mutatur caeli nitor, omnia uentis,\nOmnia turbinibus sunt anxia; iam maris unda\nSideribus certat consurgere, iamque superne\nCorripere et soles et sidera cuncta minatur\nAc ruere in terras caeli fragor. hic modo laetans\nCopia nunc miseris circumdatur anxia fatis\nImmoriturque super fluctus et saxa Capherei,\nEuboicas aut per cautes Aegaeaque late\nLitora, cum Phrygiae passim uaga praeda peremptae\nOmnis in aequoreo fluitat iam naufraga fluctu.\nHic alii <re>sident pariles uirtutis honore\nHeroes mediisque siti sunt sedibus omnes,\nOmnes Roma decus magni quos suscipit orbis.\nHic Fabii Deciique, hic est et Horatia uirtus,\nHic et fama uetus numquam moritura Camilli,\nCurtius et, mediis quem quondam sedibus urbis\nDeuotum bellis consumpsit gurges in unda;\nMucius et prudens ardorem corpore passus,\nCui cessit Lydi timefacta potentia regis;\nHic Curius clarae socius uirtutis et ille\n*Flaminius* deuota dedit qui corpora flammae\n(Iure igitur talis sedes, pietatis honores),\nScipiadaeque duces, quorum deuota triumphis\nMoenia *rapidis* Libycae Carthaginis horrent.\nIlli laude sua uigeant: ego Ditis opacos\nCogor adire lacus, uiduos, a, lumine Phoebi\nEt uastum Phlegethonta pati, quo, maxime Minos,\nConscelerata pia discernis uincula sede.\nErgo iam causam mortis, iam dicere uitae\nVerberibus saeuae cogunt ab iudice Poenae,\nCum mihi tu sis causa mali nec conscius adsis;","prev":{"citation":"Culex 289-333","label":"Lines 289-333","url":"https://interlinea.aeterna-institute.org/library/latin/appendix-vergiliana/culex/289","api":"https://interlinea.aeterna-institute.org/api/v1/library/latin/appendix-vergiliana/culex/289"},"next":{"citation":"Culex 379-414","label":"Lines 379-414","url":"https://interlinea.aeterna-institute.org/library/latin/appendix-vergiliana/culex/379","api":"https://interlinea.aeterna-institute.org/api/v1/library/latin/appendix-vergiliana/culex/379"},"credit":{"text":"Appendix Vergiliana, Culex. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Ccule%7C001","quality":"proofread"}}