{"kind":"section","lang":"la","language":"Latin","title":"Culex 48-93","citation":"Appendix Vergiliana, Culex 48-93","ref":"48","level":null,"urn":null,"url":"https://interlinea.aeterna-institute.org/library/latin/appendix-vergiliana/culex/48","api":"https://interlinea.aeterna-institute.org/api/v1/library/latin/appendix-vergiliana/culex/48","markdown":"https://interlinea.aeterna-institute.org/library/latin/appendix-vergiliana/culex/48.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Culex","url":"https://interlinea.aeterna-institute.org/library/latin/appendix-vergiliana/culex","urn":"urn:cts:latinLit:phi0692.phi003"},"verse":true,"words":296,"text":"Iam siluis dumisque uagae, iam uallibus abdunt\nCorpora iamque omni celeres e parte uagantes\nTondebant tenero uiridantia gramina morsu;\nScrupea desertas haerebant ad caua rupes,\nPendula proiectis carpuntur et arbuta ramis\nDensaque uirgultis auide labrusca petuntur.\nHaec suspensa rapit carpente cacumina morsu\nVel salicis lentae uel quae noua nascitur alnus,\nHaec teneras fruticum sentes rimatur, at illa\nImminet in riui *praestantis imaginis* undam.\nO bona pastoris (si quis non pauperis usum\nMente prius docta fastidiat et probet illis\nSomnia luxuriae spretis) incognita curis\nQuae lacerant auidas inimico pectore mentes:\nSi non Assyrio fuerint bis lota colore\nAttalicis opibus data uellera, si nitor auri\nSub laqueare domus animum non angit auarum\nPicturaeque decus, lapidum nec fulgor in ulla\nCognitus utilitate manet, nec pocula gratum\nAlconis referent Boethique toreuma, nec Indi\nConchea baca maris pretio est; at pectore puro\nSaepe super tenero prosternit gramine corpus,\nFlorida cum tellus, gemmantis picta per herbas,\nVere notat dulci distincta coloribus arua;\nAtque illum, calamo laetum recinente palustri\nOtiaque inuidia degentem et fraude remota\nPollentemque sibi uiridi cum palmite lucens\nTmolia pampineo subter coma uelat amictu;\nIlli sunt gratae rorantes lacte capellae\nEt nemus et fecunda Pales et uallibus intus\nSemper opaca nouis manantia fontibus antra.\nQuis magis optato queat esse beatior aeuo,\nQuam qui mente procul pura sensuque probando\nNon auidas agnouit opes nec tristia bella\nNec funesta timet ualidae certamina classis\nNec, spoliis dum sancta deum fulgentibus ornet\nTempla uel euectus finem transcendat habendi,\nAduersum saeuis ultro caput hostibus offert?\nIlli falce deus colitur non arte politus,\nIlle colit lucos, illi Panchaia tura\nFloribus agrestes herbae uariantibus adsunt;\nIlli dulcis adest requies et pura uoluptas,\nLibera, simplicibus curis: huic imminet, omnis\nDerigit huc sensus, haec cura est subdita cordi,\nQuolibet ut requie uictu contentus abundet\nIucundoque liget languentia corpora somno.","prev":{"citation":"Culex 1-47","label":"Lines 1-47","url":"https://interlinea.aeterna-institute.org/library/latin/appendix-vergiliana/culex/1","api":"https://interlinea.aeterna-institute.org/api/v1/library/latin/appendix-vergiliana/culex/1"},"next":{"citation":"Culex 94-139","label":"Lines 94-139","url":"https://interlinea.aeterna-institute.org/library/latin/appendix-vergiliana/culex/94","api":"https://interlinea.aeterna-institute.org/api/v1/library/latin/appendix-vergiliana/culex/94"},"credit":{"text":"Appendix Vergiliana, Culex. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Ccule%7C001","quality":"proofread"}}