{"kind":"section","lang":"la","language":"Latin","title":"Culex 94-139","citation":"Appendix Vergiliana, Culex 94-139","ref":"94","level":null,"urn":null,"url":"https://interlinea.aeterna-institute.org/library/latin/appendix-vergiliana/culex/94","api":"https://interlinea.aeterna-institute.org/api/v1/library/latin/appendix-vergiliana/culex/94","markdown":"https://interlinea.aeterna-institute.org/library/latin/appendix-vergiliana/culex/94.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Culex","url":"https://interlinea.aeterna-institute.org/library/latin/appendix-vergiliana/culex","urn":"urn:cts:latinLit:phi0692.phi003"},"verse":true,"words":279,"text":"O pecudes, o Panes et o gratissima tempe\n*Fontis* Hamadryadum, quarum non diuite cultu\nAemulus Ascraeo pastor sibi quisque poetae\nSecuram placido traducit pectore uitam.\nTalibus in studiis baculo dum nixus apricas\nPastor agit curas et dum non arte canora\nCompacta solitum modulatur harundine carmen,\nTendit ineuectus radios Hyperionis ardor\nLucidaque aetherio ponit discrimina mundo,\nQua iacit Oceanum flammas in utrumque rapaces.\nEt iam compellente uagae pastore capellae\nIma susurrantis repetebant ad uada lymphae,\nQuae subter uiridem residebant caerula muscum.\nIam medias operum partes euectus erat sol,\nCum densas pastor pecudes cogebat in umbras.\nVt procul aspexit luco residere uirenti,\nDelia diua, tuo, quo quondam uicta furore\nVenit Nyctelium fugiens Cadmeis Agaue,\nInfandas scelerata manus et caede cruenta,\nQuae gelidis bacchata iugis requieuit in antro\nPosterius poenam nati de morte datura;\nHic etiam uiridi ludentes Panes in herba\nEt Satyri Dryadesque chorus egere puellae\nNaiadum <in> coetu: non tantum Oeagrius Hebrum\nRestantem tenuit ripis siluasque canendo\nQuantum te pernix remorantem, diua, chorea\nMulta tuo laetae fundentes gaudia uultu,\nIpsa loci natura domum resonante susurro\nQuis dabat et dulci fessas refouebat in umbra.\nNam primum prona surgebant ualle patentes\nAeriae platanus, inter quas impia lotos,\nImpia, quae socios Ithaci maerentis abegit,\nHospita dum nimia tenuit dulcedine captos;\nAt, quibus insigni curru proiectus equorum\nAmbustus Phaethon luctu mutauerat artus,\nHeliades, teneris implexae bracchia truncis,\nCandida fundebant tentis uelamina ramis;\nPosterius cui Demophoon aeterna reliquit\nPerfidiam lamentandi mala - perfide multis,\nPerfide Demophoon et nunc deflende puellis;\nQuam comitabantur, fatalia carmina, quercus,\nQuercus ante datae Cereris quam semina uitae\n(Illas Triptolemi mutauit sulcus aristis);\nHic magnum Argoae naui decus addita pinus\nProceras decorat siluas hirsuta per artus\nAc petit aeriis contingere montibus astra;","prev":{"citation":"Culex 48-93","label":"Lines 48-93","url":"https://interlinea.aeterna-institute.org/library/latin/appendix-vergiliana/culex/48","api":"https://interlinea.aeterna-institute.org/api/v1/library/latin/appendix-vergiliana/culex/48"},"next":{"citation":"Culex 140-197","label":"Lines 140-197","url":"https://interlinea.aeterna-institute.org/library/latin/appendix-vergiliana/culex/140","api":"https://interlinea.aeterna-institute.org/api/v1/library/latin/appendix-vergiliana/culex/140"},"credit":{"text":"Appendix Vergiliana, Culex. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Ccule%7C001","quality":"proofread"}}