{"kind":"section","lang":"la","language":"Latin","title":"Dirae 1-46","citation":"Appendix Vergiliana, Dirae 1-46","ref":"1","level":null,"urn":null,"url":"https://interlinea.aeterna-institute.org/library/latin/appendix-vergiliana/dirae/1","api":"https://interlinea.aeterna-institute.org/api/v1/library/latin/appendix-vergiliana/dirae/1","markdown":"https://interlinea.aeterna-institute.org/library/latin/appendix-vergiliana/dirae/1.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Dirae","url":"https://interlinea.aeterna-institute.org/library/latin/appendix-vergiliana/dirae","urn":"urn:cts:latinLit:phi0692.phi001"},"verse":true,"words":282,"text":"Battare, cycneas repetamus carmine uoces:\nDiuisas iterum sedes et rura canamus,\nRura quibus diras indiximus, impia uota.\nAnte lupos rapient haedi, uituli ante leones,\nDelphini fugient pisces, aquilae ante columbas\nEt conuersa retro rerum discordia gliscet,\nMulta prius fient quam non mea libera auena\nMontibus et siluis dicat tua facta, Lycurge.\nImpia Trinacriae sterilescant gaudia uobis\nNec fecunda, senis nostri felicia rura,\nSemina parturiant segetes, non pascua colles,\nNon arbusta nouas fruges, non pampinus uuas,\nIpsae non siluae frondes, non flumina montes.\nRursus et hoc iterum repetamus, Battare, carmen:\nEffetas Cereris sulcis condatis auenas,\nPallida flauescant aestu sitientia prata,\nImmatura cadant ramis pendentia mala,\nDesint et siluis frondes et fontibus umor,\nNec desit nostris deuotum carmen auenis.\nHaec Veneris uario florentia serta decore,\nPurpureo campos quae pingunt uerna colore\n(Hinc aurae dulces, hinc suauis spiritus agri),\nMutent pestiferos aestus et taetra uenena;\nDulcia non oculis, non auribus ulla ferantur.\nSic precor, et nostris superent haec carmina uotis:\nLudimus et multum nostris cantata libellis,\nOptima siluarum, formosis densa uirectis,\nTondemus uirides umbras: nec laeta comantis\nIactabis mollis ramos inflantibus auris,\nNec mihi saepe meum resonabit, Battare, carmen.\nMilitis impia cum succidet dextera ferro\nFormosaeque cadent umbrae, formosior illis\nIpsa cades, ueteris domini felicia ligna,\nNequiquam; nostris potius deuota libellis\nIgnibus aetheriis flagrabit. Iuppiter (ipse\nIuppiter hanc aluit), cinis haec tibi fiat oportet.\nThraecis tum Boreae spirent immania uires,\nEurus agat mixtam fulua caligine nubem,\nAfricus immineat nimbis minitantibus imbrem,\nCum tu, cyaneo resplendens aethere, silua,\nNon iterum dices, crebro 'tua Lydia' dixti.\nVicinae flammae rapiant ex ordine uitis,\nPascantur segetes; diffusis ignibus auras\nTransuolet, arboribus coniungat et ardor aristas.\nPertica qua nostros metata est impia agellos,\nQua nostri fines olim, cinis omnia fiat.","prev":null,"next":{"citation":"Dirae 47-90","label":"Lines 47-90","url":"https://interlinea.aeterna-institute.org/library/latin/appendix-vergiliana/dirae/47","api":"https://interlinea.aeterna-institute.org/api/v1/library/latin/appendix-vergiliana/dirae/47"},"credit":{"text":"Appendix Vergiliana, Dirae. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cdira%7C001","quality":"proofread"}}