{"kind":"section","lang":"la","language":"Latin","title":"Dirae 134-176","citation":"Appendix Vergiliana, Dirae 134-176","ref":"134","level":null,"urn":null,"url":"https://interlinea.aeterna-institute.org/library/latin/appendix-vergiliana/dirae/134","api":"https://interlinea.aeterna-institute.org/api/v1/library/latin/appendix-vergiliana/dirae/134","markdown":"https://interlinea.aeterna-institute.org/library/latin/appendix-vergiliana/dirae/134.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Dirae","url":"https://interlinea.aeterna-institute.org/library/latin/appendix-vergiliana/dirae","urn":"urn:cts:latinLit:phi0692.phi001"},"verse":true,"words":285,"text":"Et pater haedorum felix semperque beate,\nSiue petis montes praeruptos saxa pererrans\nSiue tibi siluis noua pabula fastidire\nSiue libet campis: tecum tua laeta capella est.\nEt mas quodcumque est, illi sua femina iuncta\nInterpellatos numquam plorauit amores.\nCur non et nobis facilis, natura, fuisti?\nCur ego crudelem patior tam saepe dolorem?\nSidera per uiridem redeunt cum pallida mundum\nInque uicem Phoebe currens atque aureus orbis,\nLuna, tuus tecum est: cur non est et mea mecum?\nLuna, dolor nosti quid sit, miserere dolentis.\nPhoebe, gerens in te laurus celebrauit amorem,\nEt quae pompa deum (nisi uilis Fama locuta est,\nOmnia uos estis) secum sua gaudia gestat\nAut inspersa uidet mundo: quae dicere longum est.\nAurea quin etiam cum saecula uoluebantur,\nCondicio similis fuerat mortalibus illis.\nHaec quoque praetereo: notum Minoidos astrum\nQuaeque uirum uirgo sicut captiua secuta est.\nLaedere, caelicolae, potuit uos nostra quid aetas,\nCondicio nobis uitae quo durior esset?\nAusus egon primus castos uiolare pudores\nSacratamque meae uittam temptare puellae\nImmatura mea cogor nece soluere fata?\nIstius atque utinam facti mea culpa magistra\nPrima foret! letum uita mihi dulcius esset;\nNon mea, non ullo moreretur tempore fama,\nDulcia cum Veneris furatus gaudia primum\nDicerer atque ex me dulcis foret orta uoluptas;\nNam mihi non tantum tribuerunt impia uota,\nAuctor ut occulti noster foret error amoris:\nIuppiter ante, sui semper mendacia factus,\nCum Iunone, prius coniunx quam dictus uterque est,\nGaudia libauit dulcem furatus amorem.\nEt moechum tenera gauisa est laedere in herba\nPurpureos flores, quos insuper accumbebat,\n*Grandia* formoso supponens bracchia collo\n(Tum, credo, fuerat Mauors distentus in armis,\nNam certe Vulcanus opus faciebat, et illi\nTristi turpabat malas fuligine barba).\nNon Aurora nouos etiam plorauit amores\nAtque rubens oculos roseo celauit amictu?","prev":{"citation":"Dirae 91-133","label":"Lines 91-133","url":"https://interlinea.aeterna-institute.org/library/latin/appendix-vergiliana/dirae/91","api":"https://interlinea.aeterna-institute.org/api/v1/library/latin/appendix-vergiliana/dirae/91"},"next":{"citation":"Dirae 177-183","label":"Lines 177-183","url":"https://interlinea.aeterna-institute.org/library/latin/appendix-vergiliana/dirae/177","api":"https://interlinea.aeterna-institute.org/api/v1/library/latin/appendix-vergiliana/dirae/177"},"credit":{"text":"Appendix Vergiliana, Dirae. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cdira%7C001","quality":"proofread"}}