{"kind":"section","lang":"la","language":"Latin","title":"Dirae 47-90","citation":"Appendix Vergiliana, Dirae 47-90","ref":"47","level":null,"urn":null,"url":"https://interlinea.aeterna-institute.org/library/latin/appendix-vergiliana/dirae/47","api":"https://interlinea.aeterna-institute.org/api/v1/library/latin/appendix-vergiliana/dirae/47","markdown":"https://interlinea.aeterna-institute.org/library/latin/appendix-vergiliana/dirae/47.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Dirae","url":"https://interlinea.aeterna-institute.org/library/latin/appendix-vergiliana/dirae","urn":"urn:cts:latinLit:phi0692.phi001"},"verse":true,"words":279,"text":"Sic precor, et nostris superent haec carmina uotis.\nVndae, quae uestris pulsatis litora lymphis,\nLitora, quae dulcis auras diffunditis agris,\nAccipite has uoces: migret Neptunus in arua,\nFluctibus et spissa campos perfundat harena;\nQua Vulcanus agros pastus Iouis ignibus arcet,\nBarbara dicatur Libycae soror altera Syrtis.\nTristius hoc, memini, reuocasti, Battare, carmen:\nNigro multa mari dicunt portenta natare,\nMonstra repentinis terrentia saepe figuris,\nCum subito emersere furenti corpora ponto;\nHaec agat infesto Neptunus caeca tridenti\nAtrum conuertens aestum maris undique uentis\nEt fuscum cinerem canis exhauriat undis.\nDicantur mea rura ferum mare; nauta, caueto\nRura quibus diras indiximus, impia uota.\nSi minus haec, Neptune, tuas infundimus auris,\nBattare, fluminibus tu nostros trade dolores,\nNam tibi sunt fontes, tibi semper flumina amica;\nNil est quod perdam ulterius: merito omnia Ditis.\nFlectite currentis nymphas, uaga flumina, retro,\nFlectite et aduersis rursum diffundite campis;\nIncurrant amnes passim rimantibus undis\nNec nostros seruire sinant erronibus agros.\nDulcius hoc, memini, reuocasti, Battare, carmen:\nEmanent subito sicca tellure paludes,\nEt metat hic iuncos, spicas ubi legimus olim;\n*Coculet* arguti grylli caua garrula rana.\nTristius hoc rursum dicit mea fistula carmen:\nPraecipitent altis fumantes montibus imbres\nEt late teneant diffuso gurgite campos,\nQui dominis infesta minantes stagna relinquant.\nCum delapsa meos agros peruenerit unda,\nPiscetur nostris in finibus aduena arator,\nAduena, ciuili qui semper crimine creuit.\nO male deuoti, praetorum crimina, agelli\nTuque inimica tui semper Discordia ciuis,\nExsul ego indemnatus egens mea rura reliqui,\nMiles ut accipiat funesti praemia belli.\nHinc ego de tumulo mea rura nouissima uisam,\nHinc ibo in siluas; obstabunt iam mihi colles,\nObstabunt montes. campos audire licebit:\nDulcia rura ualete et Lydia dulcior illis\nEt casti fontes et, felix nomen, agelli.","prev":{"citation":"Dirae 1-46","label":"Lines 1-46","url":"https://interlinea.aeterna-institute.org/library/latin/appendix-vergiliana/dirae/1","api":"https://interlinea.aeterna-institute.org/api/v1/library/latin/appendix-vergiliana/dirae/1"},"next":{"citation":"Dirae 91-133","label":"Lines 91-133","url":"https://interlinea.aeterna-institute.org/library/latin/appendix-vergiliana/dirae/91","api":"https://interlinea.aeterna-institute.org/api/v1/library/latin/appendix-vergiliana/dirae/91"},"credit":{"text":"Appendix Vergiliana, Dirae. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cdira%7C001","quality":"proofread"}}