{"kind":"section","lang":"la","language":"Latin","title":"Dirae 91-133","citation":"Appendix Vergiliana, Dirae 91-133","ref":"91","level":null,"urn":null,"url":"https://interlinea.aeterna-institute.org/library/latin/appendix-vergiliana/dirae/91","api":"https://interlinea.aeterna-institute.org/api/v1/library/latin/appendix-vergiliana/dirae/91","markdown":"https://interlinea.aeterna-institute.org/library/latin/appendix-vergiliana/dirae/91.md","author":{"name":"Appendix Vergiliana","url":"https://interlinea.aeterna-institute.org/library/latin/appendix-vergiliana"},"work":{"title":"Dirae","url":"https://interlinea.aeterna-institute.org/library/latin/appendix-vergiliana/dirae","urn":"urn:cts:latinLit:phi0692.phi001"},"verse":true,"words":283,"text":"Tardius, a, miserae descendite monte capellae\n(Mollia non iterum carpetis pabula nota)\nTuque resiste pater; en prima nouissima nobis\nIntueor campos: longum manet esse sine illis.\nRura ualete iterum tuque, optima Lydia, salue:\nSiue eris et si non, mecum morieris, utrumque.\nExtremum carmen reuocemus, Battare, auena:\nDulcia amara prius fient et mollia dura,\nCandida nigra oculi cernent et dextera laeua,\nMigrabunt casus aliena in corpora rerum,\nQuam tua de nostris emigret cura medullis.\nQuamuis ignis eris, quamuis aqua, semper amabo:\nGaudia semper enim tua me meminisse licebit.\nInuideo uobis, agri formosaque prata,\nHoc formosa magis, mea quod formosa puella\nEst uobis (tacite nostrum suspirat amorem);\nVos nunc illa uidet, uobis mea Lydia ludit,\nVos nunc alloquitur, uos nunc arridet ocellis\nEt mea submissa meditatur carmina uoce,\nCantat et interea, mihi quae cantabat in aurem.\nInuideo uobis, agri: discetis amare.\nO fortunati nimium multumque beati,\nIn quibus illa pedis niuei uestigia ponet\nAut roseis uiridem digitis decerpserit uuam\n(Dulci namque tumet nondum uitecula Baccho)\nAut inter uarios, Veneris stipendia, flores\nMembra reclinarit teneramque illiserit herbam\nEt secreta meos furtim narrabit amores:\nGaudebunt siluae, gaudebunt mollia prata\nEt gelidi fontes, auiumque silentia fient,\nTardabunt riui (labentes currite lymphae,\nDum mea iucundas exponat cura querelas).\nInuideo uobis, agri: mea gaudia habetis,\nEt uobis nunc est mea quae fuit ante uoluptas.\nAt male tabescunt morientia membra dolore\nEt calor infuso decedit frigore mortis,\nQuod mea non mecum domina est. non ulla puella\nDoctior in terris fuit aut formosior, ac, si\nFabula non uana est, tauro Ioue digna uel auro\n(Iuppiter, auertas aurem) mea sola puella est.\nFelix taure, pater magni gregis et decus, a te\nVaccula non umquam secreta cubilia captans\nFrustra te patitur siluis mugire dolorem.","prev":{"citation":"Dirae 47-90","label":"Lines 47-90","url":"https://interlinea.aeterna-institute.org/library/latin/appendix-vergiliana/dirae/47","api":"https://interlinea.aeterna-institute.org/api/v1/library/latin/appendix-vergiliana/dirae/47"},"next":{"citation":"Dirae 134-176","label":"Lines 134-176","url":"https://interlinea.aeterna-institute.org/library/latin/appendix-vergiliana/dirae/134","api":"https://interlinea.aeterna-institute.org/api/v1/library/latin/appendix-vergiliana/dirae/134"},"credit":{"text":"Appendix Vergiliana, Dirae. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/VERG_APP%7Cdira%7C001","quality":"proofread"}}