{"kind":"section","lang":"la","language":"Latin","title":"Epistulae 227.1","citation":"Augustine, Epistulae 227.1","ref":"227.1","level":null,"urn":null,"url":"https://interlinea.aeterna-institute.org/library/latin/augustine/epistulae/227.1","api":"https://interlinea.aeterna-institute.org/api/v1/library/latin/augustine/epistulae/227.1","markdown":"https://interlinea.aeterna-institute.org/library/latin/augustine/epistulae/227.1.md","author":{"name":"Augustine","url":"https://interlinea.aeterna-institute.org/library/latin/augustine"},"work":{"title":"Epistulae","url":"https://interlinea.aeterna-institute.org/library/latin/augustine/epistulae","urn":"urn:cts:latinLit:stoa0040.stoa011"},"verse":false,"words":300,"text":"Frater Paulus hic est incolumis; adportat negotiorum suorum secundas curas; praestabit dominus, ut etiam ipsa ultima sint. multum uos salutat et narrat gaudia de Gauiniano, quod ab illa sua causa misericordia dei liberatus non solum Christianus sed etiam fidelis sit ualde bonus per pascha proxime baptizatus in corde atque in ore habens gratiam, quam percepit. quantum eum desiderem, quando explicabo? sed nosti, ut eum diligam. archiater etiam Dioscorus Christianus fidelis est simul gratiam consecutus. audi etiam quem ad modum; neque enim ceruicula illa uel lingua nisi aliquo prodigio domarentur. filia eius, in qua unica adquiescebat, aegrotabat et usque ad totam desperationem salutis temporalis eodem ipso patre renuntiante peruenit. dicitur ergo — et constat, cum mihi hoc et ante fratris Pauli reditum comes Peregrinus, uir laudabilis et bene Christianus, qui cum eis eodem tempore baptizatus est, indicaret —, dicitur ergo ille senex tandem conuersus ad inplorandam Christi misericordiam uoto se obligasse Christianum fore, si illam saluam uideret. factum est. at ille. quod uouerat, dissimulabat exoluere. sed adhuc manus excelsa. nam repentina caecitate suffunditur statimque uenit in mentem, unde illud esset. exclamauit confitens atque iterum uouit se recepto lumine impleturum esse, quod uouerat. recepit, impleuit. et adhuc manus excelsa. symbolum non tenuerat aut fortasse tenere recusauerat et se non potuisse excusauerat. deus uident. iam tamen post festa omnia receptionis suae in paralysin soluitur multis ac paene omnibus membris tunc somnio admonitus confitens per scripturam ob hoc sibi dictum esse accidisse, quod symbolum non reddiderit. post illam confessionem redduntur officia membrorum omnium nisi linguae solius. se tamen didicisse symbolum ideoque memoria iam tenere nihilo minus in eadem temptatione litteris fassus est et omnis est ab eo deleta nugacitas, quae, ut scis. multum dedecorabat naturalem quandam eius benignitatem eumque insultantem Christianis faciebat ualde sacrilegum. quid dicam domino, nisi hymnum canamus et superexaltemus eum in saecula? amen.","prev":{"citation":"Epistulae 226.10","label":"Letter 226","url":"https://interlinea.aeterna-institute.org/library/latin/augustine/epistulae/226.10","api":"https://interlinea.aeterna-institute.org/api/v1/library/latin/augustine/epistulae/226.10"},"next":{"citation":"Epistulae 228.1","label":"Letter 228","url":"https://interlinea.aeterna-institute.org/library/latin/augustine/epistulae/228.1","api":"https://interlinea.aeterna-institute.org/api/v1/library/latin/augustine/epistulae/228.1"},"credit":{"text":"Augustine, Epistulae, ed. Alois Goldbacher. Text: Open Greek and Latin, CSEL (University of Leipzig), CC BY-SA 4.0. Changes: notes and apparatus removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/csel-dev/blob/master/data/stoa0040/stoa011/stoa0040.stoa011.opp-lat2.xml","quality":"ocr"}}