{"kind":"section","lang":"la","language":"Latin","title":"Epistulae 32.5.93-108","citation":"Augustine, Epistulae 32.5.93-108","ref":"32.5.93","level":null,"urn":null,"url":"https://interlinea.aeterna-institute.org/library/latin/augustine/epistulae/32.5.93","api":"https://interlinea.aeterna-institute.org/api/v1/library/latin/augustine/epistulae/32.5.93","markdown":"https://interlinea.aeterna-institute.org/library/latin/augustine/epistulae/32.5.93.md","author":{"name":"Augustine","url":"https://interlinea.aeterna-institute.org/library/latin/augustine"},"work":{"title":"Epistulae","url":"https://interlinea.aeterna-institute.org/library/latin/augustine/epistulae","urn":"urn:cts:latinLit:stoa0040.stoa011"},"verse":true,"words":113,"text":"ergo redi, qua uoce parens, qua sanguine frater,\nambo sacerdotes, te remeare iubent.\nad tua te retrahunt, nam nunc aliena petessis:\nhaec mage, quae retinent regna tui, tua sunt.\nhaec repete, his inhia, externis ne contere tempus;\nsi tua nolueris, quisquam aliena dabit?\nnon eris ipse tuus missusque per extera longe\nsensibus heu! proprii pectoris exul ages.\nsollicitum satis haec nato cecinisse parentem,\ndum tibi, quae mihimet, uel uolo uel metuo.\nhaec tibi, si recipis, feret olim pagina uitam;\nsi rennuis, eadem haec pagina testis erit.\nincolumem mihi te, fili carissime, Christus\nannuat et seruum det sibi perpetuo.\nuiue, precor, sed uiue deo; nam uiuere mundo\nmortis opus, uiua est uiuere uita deo.","prev":{"citation":"Epistulae 32.5.51-92","label":"Letter 32, lines 32.5.51-32.5.92","url":"https://interlinea.aeterna-institute.org/library/latin/augustine/epistulae/32.5.51","api":"https://interlinea.aeterna-institute.org/api/v1/library/latin/augustine/epistulae/32.5.51"},"next":{"citation":"Epistulae 33.1","label":"Letter 33","url":"https://interlinea.aeterna-institute.org/library/latin/augustine/epistulae/33.1","api":"https://interlinea.aeterna-institute.org/api/v1/library/latin/augustine/epistulae/33.1"},"credit":{"text":"Augustine, Epistulae, ed. Alois Goldbacher. Text: Open Greek and Latin, CSEL (University of Leipzig), CC BY-SA 4.0. Changes: notes and apparatus removed, line-end hyphens joined and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/OpenGreekAndLatin/csel-dev/blob/master/data/stoa0040/stoa011/stoa0040.stoa011.opp-lat2.xml","quality":"ocr"}}