{"kind":"section","lang":"la","language":"Latin","title":"Opuscula 29","citation":"Ausonius, Opuscula 29","ref":"29","level":null,"urn":null,"url":"https://interlinea.aeterna-institute.org/library/latin/ausonius/opuscula/29","api":"https://interlinea.aeterna-institute.org/api/v1/library/latin/ausonius/opuscula/29","markdown":"https://interlinea.aeterna-institute.org/library/latin/ausonius/opuscula/29.md","author":{"name":"Ausonius","url":"https://interlinea.aeterna-institute.org/library/latin/ausonius"},"work":{"title":"Opuscula","url":"https://interlinea.aeterna-institute.org/library/latin/ausonius/opuscula","urn":null},"verse":true,"words":318,"text":"Quod vitae sectabor iter, si plena tumultu\nsunt fora, si curis domus anxia, si peregrinos\ncura domus sequitur, mercantem si nova semper\ndamna manent, cessare vetat si turpis egestas,\nsi vexat labor agricolam, mare naufragus horror\ninfamat, poenaeque graves in caelibe vita\net gravior cautis custodia vana maritis,\nsanguineum si Martis opus, si turpia lucra\nfaenoris et velox inopes usura trucidat?\nomne aevum curae, cunctis sua displicet aetas.\nsensus abest parvis lactantibus et puerorum\ndura rudimenta et iuvenum temeraria pubes.\nafflictat fortuna viros per bella, per aequor,\nirasque insidiasque catenatosque labores\nmutandos semper gravioribus. ipsa senectus\nexpectata diu votisque optata malignis\nobicit innumeris corpus lacerabile morbis.\nspernimus in commune omnes praesentia. quosdam\nconstat nolle deos fieri. Iuturna reclamat:\n'quo vitam dedit aeternam? cur mortis adempta est\ncondicio'? sic Caucasea sub rupe Prometheus\ntestatur Saturnigenam nec nomine cessat\nincusare Iovem, data sit quod vita perennis.\nrespice et ad cultus animi. sic nempe pudicum\nperdidit Hippolytum non felix cura pudoris.\ne contra inlecebris maculosam degere vitam\nquem iuvat, aspiciat poenas et crimina regum,\nTereos incesti vel mollis Sardanapalli.\nperfidiam vitare monent tria Punica bella,\nset prohibet servare fidem deleta Saguntos.\nvive et amicitias semper cole: crimen ob istud\nPythagoreorum periit schola docta sophorum.\nhoc metuens igitur nullas cole: crimen ob istud\nTimon Palladiis olim lapidatus Athenis.\ndissidet ambiguis semper mens obvia votis.\nnec voluisse homini satis est: optata recusat.\nesse in honore placet: mox paenitet ac, dominari\nut possit, servire volet. idem auctus honore\ninvidiae obicitur. pernox est cura disertis,\nset rudis ornatu vitae caret. esto patronus,\net defende reos: set gratia rara clientis.\nesto cliens: gravis imperiis persona patroni.\nexercent hunc vota patrum: mox aspera curis\nsollicitudo subit. contemnitur orba senectus\net captatoris praeda est heredis egenus.\nvitam parcus agas: avidi lacerabere fama.\net largitorem gravius censura notabit.\ncuncta tibi adversis contraria casibus. ergo\noptima Graiorum sententia, quippe homini aiunt\nnon nasci esse bonum aut natum cito morte potiri.","prev":{"citation":"Opuscula 28.11.4","label":"XXVIII. Cento Nuptialis., Section 11","url":"https://interlinea.aeterna-institute.org/library/latin/ausonius/opuscula/28.11.4","api":"https://interlinea.aeterna-institute.org/api/v1/library/latin/ausonius/opuscula/28.11.4"},"next":{"citation":"Opuscula 30","label":"XXX. de Viro Bono. Πυθαγορικη Αποφαcιc","url":"https://interlinea.aeterna-institute.org/library/latin/ausonius/opuscula/30","api":"https://interlinea.aeterna-institute.org/api/v1/library/latin/ausonius/opuscula/30"},"credit":{"text":"Ausonius, Opuscula. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000793.zip","quality":"proofread"}}