{"kind":"section","lang":"la","language":"Latin","title":"Opuscula 30","citation":"Ausonius, Opuscula 30","ref":"30","level":null,"urn":null,"url":"https://interlinea.aeterna-institute.org/library/latin/ausonius/opuscula/30","api":"https://interlinea.aeterna-institute.org/api/v1/library/latin/ausonius/opuscula/30","markdown":"https://interlinea.aeterna-institute.org/library/latin/ausonius/opuscula/30.md","author":{"name":"Ausonius","url":"https://interlinea.aeterna-institute.org/library/latin/ausonius"},"work":{"title":"Opuscula","url":"https://interlinea.aeterna-institute.org/library/latin/ausonius/opuscula","urn":null},"verse":true,"words":184,"text":"Vir bonus et sapiens, qualem vix repperit unum\nmilibus e cunctis hominum consultus Apollo,\niudex ipse sui, totum se explorat ad unguem:\nquid proceres vanique levis quid opinio volgi\n..........\nsecurus, mundi instar habens, teres atque rotundus,\nexternae ne quid labis per levia sidat.\nille, dies quam longus erit sub sideri cancri\nquantaque nox tropico se porrigit in capricorno,\ncogitat et iusto trutinae se examine pendit,\nne quid hiet, ne quid protuberet, angulus aequis\npartibus ut coeat, nil ut deliret amussis,\nsit solidum quodcumque subest, nec inania subter\nindicet admotus digitis pellentibus ictus,\nnon prius in dulcem declinans lumina somnum,\nomnia quam longi reputaverit acta diei:\nquae praetergressus, quid gestum in tempore, quid non?\ncur isti facto decus afuit aut ratio illi?\nquid mihi praeteritum? cur haec sententia sedit,\nquam melius mutare fuit? miseratus egentem\ncur aliquem fracta persensi mente dolorem?\nquid volui, quod nolle bonum foret? utile honesto\ncur malus antetuli? num dicto aut denique voltu\nperstrictus quisquam? cur me natura magis quam\ndisciplina trahit? sic dicta et facta per omnia\ningrediens ortoque a vespere cuncta revolvens\noffensus pravis dat palmam et praemia rectis.","prev":{"citation":"Opuscula 29","label":"XXVIIII. ex Graeco Pythagoricon de Ambigvitate Eligendae Vitae.","url":"https://interlinea.aeterna-institute.org/library/latin/ausonius/opuscula/29","api":"https://interlinea.aeterna-institute.org/api/v1/library/latin/ausonius/opuscula/29"},"next":{"citation":"Opuscula 31","label":"XXXI. ναι και ου Πυθαγορικον.","url":"https://interlinea.aeterna-institute.org/library/latin/ausonius/opuscula/31","api":"https://interlinea.aeterna-institute.org/api/v1/library/latin/ausonius/opuscula/31"},"credit":{"text":"Ausonius, Opuscula. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000793.zip","quality":"proofread"}}