{"kind":"section","lang":"la","language":"Latin","title":"Opuscula 32","citation":"Ausonius, Opuscula 32","ref":"32","level":null,"urn":null,"url":"https://interlinea.aeterna-institute.org/library/latin/ausonius/opuscula/32","api":"https://interlinea.aeterna-institute.org/api/v1/library/latin/ausonius/opuscula/32","markdown":"https://interlinea.aeterna-institute.org/library/latin/ausonius/opuscula/32.md","author":{"name":"Ausonius","url":"https://interlinea.aeterna-institute.org/library/latin/ausonius"},"work":{"title":"Opuscula","url":"https://interlinea.aeterna-institute.org/library/latin/ausonius/opuscula","urn":null},"verse":true,"words":107,"text":"Ter binos deciesque novem super exit in annos\niusta senescentum quos implet vita virorum.\nhos novies superat vivendo garrula cornix,\net quater egreditur cornicis saecula cervus.\nalipedem cervum ter vincit corvus, et illum\nmultiplicat novies Phoenix, reparabilis ales.\nquem nos perpetuo decies praevertimus aevo,\nNymphae Hamadryades, quarum longissima vita est.\nhaec cohibet finis vivacia fata animantum.\ncetera secreti novit deus arbiter aevi:\ntempora quae Stilbon volvat, quae saecula Phaenon,\nquos Pyrois habeat, quos Iuppiter igne benigno\ncircuitus, quali properet Venus alma recursu,\nqui Phoeben, quanti maneant Titana labores,\ndonec consumpto, magnus qui dicitur, anno\nrursus in anticum veniant vaga sidera cursum,\nqualia disposita steterant ab origine mundi.","prev":{"citation":"Opuscula 31","label":"XXXI. ναι και ου Πυθαγορικον.","url":"https://interlinea.aeterna-institute.org/library/latin/ausonius/opuscula/31","api":"https://interlinea.aeterna-institute.org/api/v1/library/latin/ausonius/opuscula/31"},"next":{"citation":"Opuscula 33","label":"XXXIII. Monosticha de Aerumnis Herculis.","url":"https://interlinea.aeterna-institute.org/library/latin/ausonius/opuscula/33","api":"https://interlinea.aeterna-institute.org/api/v1/library/latin/ausonius/opuscula/33"},"credit":{"text":"Ausonius, Opuscula. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000793.zip","quality":"proofread"}}