{"kind":"section","lang":"la","language":"Latin","title":"Opuscula 34","citation":"Ausonius, Opuscula 34","ref":"34","level":null,"urn":null,"url":"https://interlinea.aeterna-institute.org/library/latin/ausonius/opuscula/34","api":"https://interlinea.aeterna-institute.org/api/v1/library/latin/ausonius/opuscula/34","markdown":"https://interlinea.aeterna-institute.org/library/latin/ausonius/opuscula/34.md","author":{"name":"Ausonius","url":"https://interlinea.aeterna-institute.org/library/latin/ausonius"},"work":{"title":"Opuscula","url":"https://interlinea.aeterna-institute.org/library/latin/ausonius/opuscula","urn":null},"verse":true,"words":220,"text":"Miraris quicumque manere ingentia mundi\ncorpora, sublimi caeli circumdata gyro,\net tantae nullam moli intercedere labem,\naccipe quod mirere magis. tenuissima tantis\nprincipia et nostros non admittentia visus\nparvarum serie constant conexa atomorum,\nset solidum in parvis nullique secabile segmen.\nunde vigor viresque manent aeternaque rerum\nmobilitas nulloque umquam superabilis aevo.\ndivinis humana licet conponere. sic est\nas solidus, quoniam bis sex de partibus aequis\nconstat et in minimis paribus tamen una manet vis.\nnam si quid numero minuatur, summa vacillat\nconvulsaeque ruunt labefacto corpore partes?\nut, medium si quis vellat de fornice saxum,\nincumbunt cui cuncta, simul devexa sequentur\ncetera communemque trahent a vertice lapsum.\nnon aliter libra est. si defuit uncia, totus\nnon erit as nomenque deunx iam cassus habebit.\nnec dextans retinet nomen sextante remoto\net dodrans quadrante carens auctore carebit\ndivulsusque triens prohibet persistere bessem.\niam quincunx tibi nullus erit, si prama revellas.\net semis, cui semis erit pereuntibus assis\npartibus? et cuius librae pars septima septunx?\nlibra igitur, totum si nulla in parte vacillet:\nponderis et numeri morumque operumque et aquarum\nlibra: nec est modulus, quem non hoc nomine signes.\ntelluris, medio quae pendet in aere, libra est\net solis lunaeque vias sua libra cohercet.\nlibra dii somnique pares determinat horas,\nlibra Caledonios sine litore continet aestus:\ntu quoque certa mane morum mihi libra meorum.","prev":{"citation":"Opuscula 33","label":"XXXIII. Monosticha de Aerumnis Herculis.","url":"https://interlinea.aeterna-institute.org/library/latin/ausonius/opuscula/33","api":"https://interlinea.aeterna-institute.org/api/v1/library/latin/ausonius/opuscula/33"},"next":{"citation":"Opuscula 35","label":"XXXV. de Ratione Pverperii Maturi.","url":"https://interlinea.aeterna-institute.org/library/latin/ausonius/opuscula/35","api":"https://interlinea.aeterna-institute.org/api/v1/library/latin/ausonius/opuscula/35"},"credit":{"text":"Ausonius, Opuscula. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000793.zip","quality":"proofread"}}