{"kind":"section","lang":"la","language":"Latin","title":"Opuscula 4.2.49-85","citation":"Ausonius, Opuscula 4.2.49-85","ref":"4.2.49","level":null,"urn":null,"url":"https://interlinea.aeterna-institute.org/library/latin/ausonius/opuscula/4.2.49","api":"https://interlinea.aeterna-institute.org/api/v1/library/latin/ausonius/opuscula/4.2.49","markdown":"https://interlinea.aeterna-institute.org/library/latin/ausonius/opuscula/4.2.49.md","author":{"name":"Ausonius","url":"https://interlinea.aeterna-institute.org/library/latin/ausonius"},"work":{"title":"Opuscula","url":"https://interlinea.aeterna-institute.org/library/latin/ausonius/opuscula","urn":null},"verse":true,"words":249,"text":"da, genitor, veniam cruciataque pectora purga,\nsi te non pecudum fibris, non sanguine fuso\nquaero nec arcanis numen coniecto sub extis:\nsi scelere abstineo errori obnoxius et si\nopto magis quam fido bonus purusque probari.\nconfessam dignare animam, si membra caduca\nexecror et tacitum si paenitet altaque sensus\nformido excruciat tormentaque sera gehennae\nanticipat patiturque suos mens saucia manes.\nda, pater, haec nostro fieri rata vota precatu.\nnil metuam cupiamque nihil: satis hoc rear esse,\nquod satis est. nil turpe velim nec causa pudoris\nsim mihi. non faciam cuiquam, quae tempore eodem\nnolim facta mihi. nec vero crimine laedar,\nnec maculer dubio: paulum distare videtur\nsuspectus vereque reus. male posse facultas\nnulla sit et bene posse adsit tranquilla potestas.\nsim tenui victu atque habitu, sim carus amicis\net semper genitor sine volnere nominis huius.\nnon animo doleam, non corpore: cuncta quietis\nfungantur membra officiis, nec saucius ullis\npartibus amissum quicquam desideret usus.\npace fruar, securus agam, miracula terrae\nnulla putem. suprema diei cum venerit hora,\nnec timeat mortem bene conscia vita nec optet.\npurus ab occultis enm te indulgente videbor,\nomnia despiciam, fuerit cum sola voluptas\niudicium sperare tuum. quod dum sua differt\ntempora cunctaturque dies, procul exige saevum\ninsidiatorem blandis erroribus anguem.\nhaec pia, sed maesto trepidantia vota reatu,\nnate, aput aeternum placabilis adsere patrem,\nsalvator, deus ac dominus, mens, gloria, verbum.\nfilius, ex vero verus, de lumine lumen,\naeterno cum patre manens, in saecula regnans,\nconsona quem celebrant modulati carmina David:\net responsuris ferit aëra vocibus Amen.","prev":{"citation":"Opuscula 4.2.1-48","label":"IIII. Ephemeris ID est Totius Diei Negotium., 3. Oratio., lines 4.2.1-4.2.48","url":"https://interlinea.aeterna-institute.org/library/latin/ausonius/opuscula/4.2.1","api":"https://interlinea.aeterna-institute.org/api/v1/library/latin/ausonius/opuscula/4.2.1"},"next":{"citation":"Opuscula 4.3","label":"IIII. Ephemeris ID est Totius Diei Negotium., 4. Egressio.","url":"https://interlinea.aeterna-institute.org/library/latin/ausonius/opuscula/4.3","api":"https://interlinea.aeterna-institute.org/api/v1/library/latin/ausonius/opuscula/4.3"},"credit":{"text":"Ausonius, Opuscula. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000793.zip","quality":"proofread"}}