{"kind":"section","lang":"la","language":"Latin","title":"Opuscula 5.3","citation":"Ausonius, Opuscula 5.3","ref":"5.3","level":null,"urn":null,"url":"https://interlinea.aeterna-institute.org/library/latin/ausonius/opuscula/5.3","api":"https://interlinea.aeterna-institute.org/api/v1/library/latin/ausonius/opuscula/5.3","markdown":"https://interlinea.aeterna-institute.org/library/latin/ausonius/opuscula/5.3.md","author":{"name":"Ausonius","url":"https://interlinea.aeterna-institute.org/library/latin/ausonius"},"work":{"title":"Opuscula","url":"https://interlinea.aeterna-institute.org/library/latin/ausonius/opuscula","urn":null},"verse":true,"words":146,"text":"Iane nove, primo qui das tua nomina mensi,\nIane bifrons, spectas tempora bina simul.\npost superum cultus vicino Februa mense\ndat Numa cognatis manibus inferias.\nMartins et generis Romani praesul et anni\nprima dabas Latiis tempora consulibus.\nAeneadum genetrix vicino nomen Aprili\ndat Venus: est Marti namque Aphrodita comes.\nMaia dea an maior, Mai, te fecerit aetas,\nambigo: sed mensi est auctor uterque bonus.\nIunius hunc sequitur duplici celebrandus honore,\nseu nomen Iuno sive Iuventa dedit.\ninde Dionaeo praefulgens Iulius astro\naestatis mediae tempora certa tenet.\nAugustus sequitur cognatum a Caesare nomen,\nordine sic anni proximus, ut generis.\nnectuntur post hos numerumque ex ordine signant:\nSeptember, Bacchi munere praela rigans,\net qui sementis per tempora faenore laetus\nOctober cupidi spem fovet agricolae,\nquique salo mergens sollemnia signa November\npraecipitat, caelo mox reditura suo.\nconcludens numerum genialia festa December\nfinit, ut a bruma mox novus annus eat.","prev":{"citation":"Opuscula 5.2","label":"V. Eglogarum ‹Liber›., 2. Monosticha de Mensibus.","url":"https://interlinea.aeterna-institute.org/library/latin/ausonius/opuscula/5.2","api":"https://interlinea.aeterna-institute.org/api/v1/library/latin/ausonius/opuscula/5.2"},"next":{"citation":"Opuscula 5.4","label":"V. Eglogarum ‹Liber›., 4. de Tribus Menstrvis Mensuum.","url":"https://interlinea.aeterna-institute.org/library/latin/ausonius/opuscula/5.4","api":"https://interlinea.aeterna-institute.org/api/v1/library/latin/ausonius/opuscula/5.4"},"credit":{"text":"Ausonius, Opuscula. Text: Monumenta Germaniae Historica (openMGH), CC BY 4.0. Changes: apparatus and markup removed and the text divided into reading sections by Interlinea.","license":"CC BY 4.0","licenseUrl":"https://creativecommons.org/licenses/by/4.0/","source":"https://data.mgh.de/openmgh/bsb00000793.zip","quality":"proofread"}}