{"kind":"section","lang":"la","language":"Latin","title":"Precationes 1","citation":"Ausonius, Precationes 1","ref":"1","level":null,"urn":"urn:cts:latinLit:stoa0045.stoa026.perseus-lat2:1","url":"https://interlinea.aeterna-institute.org/library/latin/ausonius/precationes/1","api":"https://interlinea.aeterna-institute.org/api/v1/library/latin/ausonius/precationes/1","markdown":"https://interlinea.aeterna-institute.org/library/latin/ausonius/precationes/1.md","author":{"name":"Ausonius","url":"https://interlinea.aeterna-institute.org/library/latin/ausonius"},"work":{"title":"Precationes","url":"https://interlinea.aeterna-institute.org/library/latin/ausonius/precationes","urn":"urn:cts:latinLit:stoa0045.stoa026"},"verse":true,"words":360,"text":"IANUARIAS FASCIBUS SUMPTIS\nIANE, VENI: NOVUS ANNE, VENI: RENOVATE VENI, SOL. …\n…\nconsulis Ausonii Latiam visure curulem,\necquid ab Augusta nunc maiestate secundum\nquod mireris, habes? Roma illa domusque Quirini\net toga purpurei rutilans praetexta senati\nhoc apice aeternis signat sua tempora fastis.\nIANE, VENI: NOVUS ANNE, VENI: RENOVATE VENI, SOL.1\nAnne, bonis coepte auspiciis, da vere salubri\napricas ventorum animas, da roscida Cancro\nsolstitia et gelidum Boream Septembribus horis,\nmordeat autumnis frigus subtile pruinis\net tenuata moris cesset mediocribus aestas,\nsementem Notus umificet, sit bruma nivalis,\ndum pater antiqui renovatur Martius anni.\nIANE, VENI: NOVUS ANNE, VENI: RENOVATE VENI, SOL.\nSpiret odorato florum nova gratia Maio,\nIulius et segetes coquat et mare temperet Euris,\nSirius ardentem non augeat igne Leonem,\ndiscolor arboreos variet Pomona sapores,\nmitiget autumnus, quod maturaverit aestas,\net genialis hiems parta sibi dote fruatur,\npacem mundus agat nec turbida sidera regnent.\nIANE, VENI: NOVUS ANNE, VENI: RENOVATE VENI, SOL.\nNulla tuos, Gradive, offendat stella penates,\nquae non aequa tibi; non Cynthia, non celer Arcas\nfinitimus terris; non tu, Saturne, supremo\nultime circuitu: procul a Pyroente remotus\ntranquillum properabis iter. vos comminus ite,\nstella salutigeri Iovis et Cythereie Vesper:\nnon umquam hospitibus facilis Cyllenius absit.\nIANE, VENI: NOVUS ANNE, VENI: RENOVATE VENI, SOL.\nHostibus edomitis, qua Francia mixta Suebis\ncertat ad obsequium, Latiis ut militet armis,\nqua vaga Sauromates sibi iunxerat agmina Chuni,\nquaque Getes sociis Histrum adsultabat Alanis\n(hoc mihi praepetibus victoria nuntiat alis):\niam venit Augustus, nostros ut comat honores,\nofficio exornans, quos participare cupisset.\nIANE, VENI: NOVUS ANNE, VENI: RENOVATE VENI, SOL.\nAurea venturo, Sol, porrige gaudia Iano:\nfascibus Ausonii succedet Caesar in annum,\nquintam Romulei praetextam habiturus honoris,\necce ubi se cumulat mea purpura (mitibus audi\nauribus hoc. Nemesis) post me dignatur oriri\nAugustus consul, plus quam conferre videtur\nme sibi, qui iussit nostros praecedere fasces.\nIANE, VENI: NOVUS ANNE, VENI: RENOVATE VENI, SOL.\nTu tropicum soli da cedere, rursus et illum\nterga dare, ut duplex tropico varietur ab astro\net quater a ternis properet mutatio signis,\naestivos inpelle dies brumamque morantem\nnoctibus adceleret promissus Caesaris annus,\nillum ego si cernam, tum terque quaterque beatus,\ntunc ero bis consul, tunc tangam vertice caelum.","prev":null,"next":{"citation":"Precationes 2","label":"Poem 2","url":"https://interlinea.aeterna-institute.org/library/latin/ausonius/precationes/2","api":"https://interlinea.aeterna-institute.org/api/v1/library/latin/ausonius/precationes/2"},"credit":{"text":"Ausonius, Precationes, ed. Hugh G. Evelyn-White. Text: the Perseus Digital Library, canonical-latinLit, CC BY-SA 4.0. Changes: apostrophes normalised and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://github.com/PerseusDL/canonical-latinLit/blob/master/data/stoa0045/stoa026/stoa0045.stoa026.perseus-lat2.xml","quality":"proofread"}}