{"kind":"section","lang":"la","language":"Latin","title":"Aratea 1-45","citation":"Avienus, Aratea 1-45","ref":"1","level":null,"urn":null,"url":"https://interlinea.aeterna-institute.org/library/latin/avienus/aratea/1","api":"https://interlinea.aeterna-institute.org/api/v1/library/latin/avienus/aratea/1","markdown":"https://interlinea.aeterna-institute.org/library/latin/avienus/aratea/1.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":291,"text":"Carminis incentor mihi Iuppiter: auspice terras\nlinquo Ioue, excelsam reserat dux Iuppiter aethram,\nimus in astra Iouis monitu, Iouis omine caelum\net Iouis imperio mortalibus aethera pando.\nHic statio, hic sedes primi patris. Iste paterni\nprincipium motus, uis fulminis iste corusci,\nuita elementorum, mundi calor, aetheris ignis\nastrorumque uigor, perpes substantia lucis\net numerus celsi modulaminis. Hic tener aer\nmateriaeque grauis concretio, sucus ab alto\ncorporibus caelo, cunctarum alimonia rerum,\nflos et flamma animae: qui discurrente meatu\nmolis primigenae penetralia dura resoluens\nimpleuit largo uenas operatus amore,\nordinis ut proprii foedus daret. Iste calorem\nquo digesta capax solidaret semina mundus\ninseruit. Rite hunc primum, medium atque secundum\nuox secreta canit: sibi nam permixtus utrimque\net fultus sese geminum latus, unus et idem est\nauctor agendorum propriique patrator amoris\net mundi uere sanctus pater. Hic chaos altum\nlumine perrupit, tenebrarum hic uincula primus\nsoluit et ipse parens rerum fluitantia fixit;\nhic dispersa locis statuit primordia iustis,\nhic digestorum speciem dedit; iste colorem\nimposuit rebus, sexuque immixtus utroque\natque aeui pariter gemini simul omnia lustrans,\nsufficit alterno res semine. Rerum opifex hic,\nhic altor rerum, rex mundi, celsa potestas\naetheris atque Erebi, pigra inclinatio nodi,\ninsociabilium discretio iusta deorum,\ncuius et extremum tellus opus, ignea cuius\nlumina sunt late, sol et soror, ille diei\ntendat ut infusi rutilum iubar, altera noctis\nut face flammanti tenebrosos rumpat amictus.\nNec defit genitis pater ullo in tempore rebus:\nistius ille anni pulcher chorus, alta ut hebescat\nterra gelu, uer ut blandis adrideat aruis,\npuluerulenta siti tellurem ut torreat aestas\net grauis autumni redeat fetura parentis.\nHoc duce per tumidi ferimur freta gurgitis, isto\npraeceptore solum grauibus uersamus aratris.\nIste modum statuit signis, hic rebus honorem\ninfundit; tenebris hic interlabitur aethrae\nuiscera et aeternos animat genitabilis artus.","prev":null,"next":{"citation":"Aratea 46-92","label":"Lines 46-92","url":"https://interlinea.aeterna-institute.org/library/latin/avienus/aratea/46","api":"https://interlinea.aeterna-institute.org/api/v1/library/latin/avienus/aratea/46"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}