{"kind":"section","lang":"la","language":"Latin","title":"Aratea 1005-1050","citation":"Avienus, Aratea 1005-1050","ref":"1005","level":null,"urn":null,"url":"https://interlinea.aeterna-institute.org/library/latin/avienus/aratea/1005","api":"https://interlinea.aeterna-institute.org/api/v1/library/latin/avienus/aratea/1005","markdown":"https://interlinea.aeterna-institute.org/library/latin/avienus/aratea/1005.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":301,"text":"Spira Anguis, leuis hic Crater et edacia Corui\nora inhiant, hic sunt flexarum denique flammae\nChelarum, genua hic rigidi uibrant Ophiuchi.\nNec Iouis armigero caret alite: namque per ipsum\nfulua Aquila est. Caput hic Equus eminet, hicque comanti\nceruice erigitur clarae dator Hippucrenae.\nTris omnis recto contentos tramite caeli\ndistantisque pari spatio sibi transigit axis,\nomnibus et mediis ter circumfunditur idem.\nDesuper obliqua est alii uia, quartus et iste\nstringitur artatus zonarum mole duarum,\nquas ab diuersa mundi regione locatas\ncire repercussi momentum diximus astri;\nhunc alius medium medius secat. Haud dea Pallas,\nuel licet haec cunctos praecellat acumine diuos,\ncompingat parili sic lubrica plaustra meatu,\nimplicet ut spatiis sibimet distantibus orbes,\nqualia deuexo nectuntur ab ordine cuncta\nurgenturque uiam similem noctesque diesque\nlucis ab exortu procul in uada Calpetana.\nNam Tithoneo cum sunt elata profundo,\nrursus in occiduos merguntur singula fluctus\nordine partito: similis nascentibus ortus,\nscandendi lex una mouet; par denique lapsus\nomnibus, et simili conduntur sidera casu.\nIlle autem Oceani tantum descendit in aequor\nquantum ab caeruleo distat Cancro Capricornus,\net quam multus item est, ubi gurgite protulit ortum,\ntantus in aduersas itidem est cum labitur undas\nsignifer. In spatio, quantum deducitur orae\nambitus extremae, puncti uice terra locanda est,\nunde acies, oculis cum tenditur (haec quoque puncti\nsedem habet exiguo), procurrit missa per auras.\nSigniferi in summum medio de tramite si quis\ndirigat obtutus agilis procul, hosque locorum\ndefessos longo spatio tener amputet aer,\nid quod contenti uisus absciditur ultro\nsiqui in signiferi patulum circumferat orbem,\nsex olli partis magnae dabit ambitus orae;\nast hae dimensa spatii sic lege locantur\nbina ut decisis includant partibus astra.\nOlli Cancer inest, Leo flammifer, Attica Virgo,\nbracchia sunt itidem Chelarum et Scorpius ipse,\nArquitenens, saetosa dehinc species Capricorni\nuoluitur, auratam protendit Aquarius urnam,\ntum duo sunt Pisces, Aries, Taurus Geminique.","prev":{"citation":"Aratea 962-1004","label":"Lines 962-1004","url":"https://interlinea.aeterna-institute.org/library/latin/avienus/aratea/962","api":"https://interlinea.aeterna-institute.org/api/v1/library/latin/avienus/aratea/962"},"next":{"citation":"Aratea 1051-1095","label":"Lines 1051-1095","url":"https://interlinea.aeterna-institute.org/library/latin/avienus/aratea/1051","api":"https://interlinea.aeterna-institute.org/api/v1/library/latin/avienus/aratea/1051"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}