{"kind":"section","lang":"la","language":"Latin","title":"Aratea 1051-1095","citation":"Avienus, Aratea 1051-1095","ref":"1051","level":null,"urn":null,"url":"https://interlinea.aeterna-institute.org/library/latin/avienus/aratea/1051","api":"https://interlinea.aeterna-institute.org/api/v1/library/latin/avienus/aratea/1051","markdown":"https://interlinea.aeterna-institute.org/library/latin/avienus/aratea/1051.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":295,"text":"His se bis senis sol admouet, hisque recurrens\nomnibus absoluit totos reparabilis annos.\nQuem cum signiferi graditur sol aureus orbem,\nsingula frugiparos attollunt tempora uultus.\nIllius Oceano quantum submergitur alto,\ntantum tellurem supereminet. Omnibus iste\nnoctibus illabens pelago sex inserit astra,\nsex reparat. Tanto nox umida tempore semper\ntenditur, extulerit quantum se circulus undis\nAt si scire uelis mora lucem quanta retentet\net quanto nox atra sibi trahat otia lapsu,\nquae procul Oceano consurgunt signa notato:\nhorum semper enim comes est Titanius uni.\nHorum prima oculis memor incunabula quaere,\nluminis ipsa uagi captans uenatibus, ipsa,\nipsa notans mundo. Quae si se nubibus abdent,\naut si, cum surgunt, ut tellus saepe tumescit,\noccultata iugo praetentaque rupe latebunt,\nprompta uia est aliis uenientum tempora signis\nnoscere: namque ipso deprenderis indice cuncta\nOceano, magnam qui circum amplectitur undis\ntellurem, curuet celando ut litora mundo\nlatius atque sinu patuli salis hauriat astra.\nIstius indicium praebebunt cornua semper,\nuel matutino qua perstrepit aera fluctu,\nacer Atlantei uel qua furit aequoris aestu.\nNam non obscurae, cum Cancer commouet ortum,\nOceano stellae circumuoluentur utroque,\nin freta labentes aut quae <se> rursus Eoi\nparte ferunt mundi. Minoae clara Coronae\nserta cadent, Austri tergo cadet incola Piscis;\nhunc medium pendere tamen mediumque sub undas\ncedere per spinam, rutila labente Corona,\nsemper suspicies. At tergi plurima uersum\nuentre tenus summo supera inter sidera cernes:\nos et colla dehinc et pectora uasta per aequor\nmersantur. Premit ab genibus celsos Ophiuchum\nusque umeros Cancer, Cancer premit ortus et Anguem,\nagmine qua uasto fluitat caput, aspera ceruix\nqua tumet et spiris qua turgent pectora primis.\nParte nec Arcturus distabit multus utraque:\niam minor in superis, iam uiscera plurimus alto\nconditur; hunc etenim consortem quattuor astris\nOceanus recipit. Satur hic uix luminis, omnis\ncedit et inspiciens tandem conuexa relinquit.","prev":{"citation":"Aratea 1005-1050","label":"Lines 1005-1050","url":"https://interlinea.aeterna-institute.org/library/latin/avienus/aratea/1005","api":"https://interlinea.aeterna-institute.org/api/v1/library/latin/avienus/aratea/1005"},"next":{"citation":"Aratea 1096-1138","label":"Lines 1096-1138","url":"https://interlinea.aeterna-institute.org/library/latin/avienus/aratea/1096","api":"https://interlinea.aeterna-institute.org/api/v1/library/latin/avienus/aratea/1096"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}