{"kind":"section","lang":"la","language":"Latin","title":"Aratea 1096-1138","citation":"Avienus, Aratea 1096-1138","ref":"1096","level":null,"urn":null,"url":"https://interlinea.aeterna-institute.org/library/latin/avienus/aratea/1096","api":"https://interlinea.aeterna-institute.org/api/v1/library/latin/avienus/aratea/1096","markdown":"https://interlinea.aeterna-institute.org/library/latin/avienus/aratea/1096.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":278,"text":"Tum iam plus mediis nox inclinabitur horis\ncum labente die Phoebo comes ibit in undas.\nIsta quidem uasti conduntur gurgitis alto;\ncontra autem, nullo non uultum uiscere honorans\nOrion, rutilans ardentia cingula late,\net flagrans umeros et splendens ense corusco\nEridanumque trahens, alio se litore promit.\nAdueniente dehinc uilloso colla Leone,\nomnia quae Cancro sese emergente per aethram\nextima erant abeunt. Quin et Iouis ales in undas\nconditur et totis raptim petit aequora pinnis.\nSed Nixus genibus, replicato iuge residens\npoplite, iam superi celatur corporis artus;\nnon tamen iste genu, non laeuam gurgite plantam\nocculitur, non Oceanus uorat omnia signi.\nProserit Hydra caput, claro Lepus exsilit ortu\nEt Procyon primique pedes Canis ignicomantis.\nErigone salsis cum uultum exegerit undis\naeris ut patuli iam conscia permeet aethram,\nastrorum numerosa premit. Nam Virgine Eoo\nconsurgente freto cedit Lyra Cyllenaea,\ncedit Delphinus pelago ceditque Sagitta,\nprimaque pinnarum pars canum condit Olorem:\nuix iam cauda salum superat; uix lumine parco\neminet Eridanus: ponto procul efflua tinguit.\nCelatur sonipes caput impiger, ardua ceruix\nTethyos ima petit, salso iuba rore madescit.\nHydra superpositum procul in Cratera mouetur\nparte alia et liber uestigia Sirius ardet\nultima, caeruleo protelans aequore Puppim.\nIlla micat maloque tenus sese exserit Argo,\ncum iam uirgineos aether uehit altior artus.\nNec, cum falcatas emittunt marmora Chelas\nsideris expertis et clara luce carentis,\nnon est nota dies aut est ignobilis ortus.\nNamque his indicium proprio fert ore Bootes\nplurimus exoriens, Arcturumque eminus alto\ncardine succendit. Iam celso Thessala Puppis\naethere subuehitur, iam mundo funditur Hydra\nlongior, extremaeque polum subit indiga caudae.\nCurua Chii caelo cum surgunt bracchia signi,\ninspice ceu dextra referatur ab aequore planta\ninque genu tantum Nixus pede proferat ortum.","prev":{"citation":"Aratea 1051-1095","label":"Lines 1051-1095","url":"https://interlinea.aeterna-institute.org/library/latin/avienus/aratea/1051","api":"https://interlinea.aeterna-institute.org/api/v1/library/latin/avienus/aratea/1051"},"next":{"citation":"Aratea 1139-1183","label":"Lines 1139-1183","url":"https://interlinea.aeterna-institute.org/library/latin/avienus/aratea/1139","api":"https://interlinea.aeterna-institute.org/api/v1/library/latin/avienus/aratea/1139"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}