{"kind":"section","lang":"la","language":"Latin","title":"Aratea 1139-1183","citation":"Avienus, Aratea 1139-1183","ref":"1139","level":null,"urn":null,"url":"https://interlinea.aeterna-institute.org/library/latin/avienus/aratea/1139","api":"https://interlinea.aeterna-institute.org/api/v1/library/latin/avienus/aratea/1139","markdown":"https://interlinea.aeterna-institute.org/library/latin/avienus/aratea/1139.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":293,"text":"Iste Lyrae rutilat conterminus, atque sub unis\nhic tenebris petit occidui uada caerula ponti\net mox Oceano reparatur clarus Eoo.\nCum Chelis igitur pede tantum promitur uno;\nipse dehinc, uersus procul in caput, ultima monstri\nterga manet, manet Arquitenens dum spicula caelo\nexserat et supera uibret bellator in aethra.\nHaec sidus reuehunt: Chelae crus, Scorpius ipse\ncetera cum medio, laeuam et caput oraque rursum\nArcus agit. Tribus hic tandem remorantia membra\npartibus erigitur, tria totum denique signa\nabsoluunt pelago. Mediae tum serta Coronae\net quae Centauro diffunditur extima cauda,\nprima uenenati cum repunt bracchia monstri,\nsurgunt Oceano. Iam gurges et ultima Cygni\net caput acris Equi premit aequore, iam procul ista\nmarmoris occidui penitus petiere profundum\nhausta salo. Caput Andromedae freta uasta receptant,\nac formidatam deuexi cardine mundi\nfluctigeni speciem monstri superinuehit Auster.\nSed Boreae de parte trucis uelut aggere ab alto\nprospiciens superi subrecto uerticis axe\nintentusque procul specie, uaga bracchia Cepheus\nexserit et saeuam pelagi monet adfore pestem.\nIlla tamen, uersa in Fluuium, postrema profundo\ntinguitur ab spina capiti quae proxima summo est.\nVndas succedens Cepheus et uerticem et ulnas\nmersatur patulas. Quin et cum Scorpius acer\nnascitur Oceano, quidquid per sidera aquarum\nad speciem Eridanus pater exspuit, abditur alta\nTethye et occidui tegitur Padus aequore ponti.\nScorpius ingentem perterritat Oriona\nproserpens pelago. Vetus, o Latonia uirgo,\nfabula, nec nostro struimus mendacia uersu:\nprima nefas duri compegit germinis aetas,\nprima dedit populis. Caecus mos mentis acerbae\nimmodicusque furor sceleris penetrauerat oestro\nimpia corda uiri. Caluerunt dira medullis\nprotinus in mediis incendia, plurimus ardor\npectore flagrauit. Tene improbus ille procaxque,\nte, dea, te dura ualuit contingere dextra,\ncum sacrata Chii nemora et frondentia late\nbracchia lucorum, cum siluae colla comasque\ndeuotae tibimet manus impia demolita est\naudax ut facinus donum fouet Oenopioni?","prev":{"citation":"Aratea 1096-1138","label":"Lines 1096-1138","url":"https://interlinea.aeterna-institute.org/library/latin/avienus/aratea/1096","api":"https://interlinea.aeterna-institute.org/api/v1/library/latin/avienus/aratea/1096"},"next":{"citation":"Aratea 1184-1226","label":"Lines 1184-1226","url":"https://interlinea.aeterna-institute.org/library/latin/avienus/aratea/1184","api":"https://interlinea.aeterna-institute.org/api/v1/library/latin/avienus/aratea/1184"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}