{"kind":"section","lang":"la","language":"Latin","title":"Aratea 1184-1226","citation":"Avienus, Aratea 1184-1226","ref":"1184","level":null,"urn":null,"url":"https://interlinea.aeterna-institute.org/library/latin/avienus/aratea/1184","api":"https://interlinea.aeterna-institute.org/api/v1/library/latin/avienus/aratea/1184","markdown":"https://interlinea.aeterna-institute.org/library/latin/avienus/aratea/1184.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":279,"text":"Digna sed immodico merces stetit ilicet ausu:\nnam dea, nubiferi perrumpens uiscera montis,\ndirum antris animal saeuos uomit hostis in artus.\nErgo ut falcatis monstrum petit Oriona\nmorsibus et totas in membra ferocia chelas\nintulit, ille mali poenas luit. Ista furori\npraemia debentur, sunt haec commercia laesis\nsemper numinibus. Metus hic, metus acer in astro\npermanet et, primo cum Scorpius editur ortu,\nOrion trepido terrae petit extima cursu.\nNec minus Andromedae quidquid uolitabat in aethra\net siquid Pistris reliquum conuexa uehebant\nhoc oriente ruunt. Omnis procul in uada terror\ninserit et cunctos pauor unus in aequora cogit.\nCepheus ipse caput distentaque bracchia uasto\ninduitur ponto, tellurem cingula radunt\nextima, et Oceano mersantur pectora rauco\nsola senis; reliquum polus altior aere uersat\nsemper inocciduo. Genetrix quoque Cassiepia\nsidera praecipitis sequitur labentia natae,\ndeformemque trahit procul in uada caeca ruinam.\nProna caput solio, solio uestigia ab alto\nsustollit miseranda super: quatit ira furorque\nDoridos et Panopes post fata nouissima matrem,\nac memor has poenas dolor exigit. Omnia fluctus\nhaec simul occiduos subeunt; tamen altera mundus\nsufficit, inque uicem lapsorum multa reportat.\nTempore namque isto reliquae se serta Coronae\nexpediunt pelago, postremique agminis Hydra\nerigitur caudam. Caput et turgentia membra\nCentauro exsuperant, manus effert dextera praedam\nsiluarum. Nam prima ferae uestigia molis\nArcum sera manent, Arcu redeunte per aethram\nprotolli incipiunt, reliquum Serpentis et artus\nAnguitenentis item fert primis fluctibus Arcus.\nAmborum capita et palmas geminas Ophiuchi\nac primam rutili spiram Serpentis Eoo\nScorpius Oceano surgens agit. A pede Nixi,\nquem procul auersum semper salis alta remittunt,\ntunc artus medii, tum pectora uasta umerusque\ndexteraque ulnarum spumosi gurgitis aestu\nprocedunt pariter. Caput et manus altera porro,\ntota Sagittigeri cum uibrant astra, feruntur.","prev":{"citation":"Aratea 1139-1183","label":"Lines 1139-1183","url":"https://interlinea.aeterna-institute.org/library/latin/avienus/aratea/1139","api":"https://interlinea.aeterna-institute.org/api/v1/library/latin/avienus/aratea/1139"},"next":{"citation":"Aratea 1227-1271","label":"Lines 1227-1271","url":"https://interlinea.aeterna-institute.org/library/latin/avienus/aratea/1227","api":"https://interlinea.aeterna-institute.org/api/v1/library/latin/avienus/aratea/1227"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}