{"kind":"section","lang":"la","language":"Latin","title":"Aratea 1272-1313","citation":"Avienus, Aratea 1272-1313","ref":"1272","level":null,"urn":null,"url":"https://interlinea.aeterna-institute.org/library/latin/avienus/aratea/1272","api":"https://interlinea.aeterna-institute.org/api/v1/library/latin/avienus/aratea/1272","markdown":"https://interlinea.aeterna-institute.org/library/latin/avienus/aratea/1272.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":275,"text":"His in summa poli surgentibus, ille per Austrum\nPiscis item, planta quem pulcher Aquarius urget,\nredditur; haud toto tamen hic se corpore promit,\nsed manet alterius uenientis tempora signi:\nparte latet, partem supera in conuexa sonoris\nfluctibus absoluit pelagi. Sic bracchia maestae\nAndromedae, sic crura dehinc umerique nitentes\npaulatim recauo redeunt maris, aurea caelo\npostquam adolent Pisces incendia. Denique Pisces\ncum rutilant mundo, dextram haec attollitur ulnam,\nlaeuaque uirginei rursum se corporis edent\nPhrixei postquam pecoris proruperit ortus.\nAustralem hic Aries Aram procul admouet undis\ngurgitis occidui. Qua lux redit, excitat idem\nPersea proceri sustollere uerticis astra\net claros fulgere umeros; at cetera nondum\nsunt exempta salo. Quin totum hoc inuida ueri\nNatura ambigua rerum ratione reliquit\nextimus an reliquos Aries produceret artus\nPerseos an Tauro freta pelleret adsurgente.\nHoc una caelum subit integer. Haud reses ullo\nuiscere nascentis noua Tauri deserit astra\nquippe huius flammis Aurigae sidus inhaeret,\nnec tamen hunc totum sustollit Taurus in aethram:\nAurigam salsis euoluunt fluctibus omnem\nsurgentes Gemini. Tauro Capra plantaque laeua\natque Haedi exsuperant, cum primum rursus ab undis\ncetosa in superum referuntur uiscera caelum:\nnam cauda et cristae rigor arduus aera celsum\ntunc repetunt. Diri cum sidera gurgite monstri\nuoluit praecipitis teres inclinatio mundi,\neminus ingentem condit pars prima Booten.\nQuattuor hic etenim signis surgentibus altum\nuix penetrat pelagus, neque summa totus ab aethra\nlabitur Arcturus: manus olli quippe sinistra\niuge manet, celsisque super subducitur Vrsis.\nAt cum iam pedibus repetit fluctus Ophiuchus,\nut genua Oceanus uasto procul aequore condat,\nsignum erit Eoa Geminos procedere parte.\nNec lateri Pistrix cuiquam uicina uidetur,\nsed iam tota super sustollitur, exspuit atram\niam pelagus speciem nec adhuc tamen extima sorbent.","prev":{"citation":"Aratea 1227-1271","label":"Lines 1227-1271","url":"https://interlinea.aeterna-institute.org/library/latin/avienus/aratea/1227","api":"https://interlinea.aeterna-institute.org/api/v1/library/latin/avienus/aratea/1227"},"next":{"citation":"Aratea 1314-1361","label":"Lines 1314-1361","url":"https://interlinea.aeterna-institute.org/library/latin/avienus/aratea/1314","api":"https://interlinea.aeterna-institute.org/api/v1/library/latin/avienus/aratea/1314"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}