{"kind":"section","lang":"la","language":"Latin","title":"Aratea 1314-1361","citation":"Avienus, Aratea 1314-1361","ref":"1314","level":null,"urn":null,"url":"https://interlinea.aeterna-institute.org/library/latin/avienus/aratea/1314","api":"https://interlinea.aeterna-institute.org/api/v1/library/latin/avienus/aratea/1314","markdown":"https://interlinea.aeterna-institute.org/library/latin/avienus/aratea/1314.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":303,"text":"Quin et nascentis suspectat nauita ponto\nagmina prima Padi caelo tum feruere aperto,\nuicinasque faces rutili manet Orionis,\ncurricula ut sollers uero mox indice discat\ncerta tenebrarum, possitque fideliter astro\nexplorare Notos et tuto carbasa ponto\ncredere. Ni desit magnorum congrua cura,\nprompta uia est ipso cognoscere talia semper\npraeceptore Ioue, et caelo tibi signa magistro\nomnia ducentur: monet alta Iuppiter aethra\nsingula nos, facilis ueram dedit arbiter artem\nne tempestatum primordia caeca laterent.\nNonne uides, primum cum Phoebe in cornua surgit\ntenuia et angusto lumen iacit ore per aethram\ndecedente die pronoque ab tramite solis,\npromat ut ingressi sollers tibi tempora mensis?\nNamque facem quarti sibimet profitebitur ignis\ncorpora cum primum perfundens lumine nostra\nin subiecta soli tenuem porrexerit umbram.\nAst orbis medii si caedat Cynthia formam,\noctauos ortus octauaque plaustra docebit.\nDenique cum toto dea iam surrexerit ore\ninteger ut magni resplendeat ambitus orbis,\neffluxisse sibi medii iam tempora mensis\nmonstrabit caelo. Pleni cum rursus egena\noris eat, tanto procedens lumine formae\ninserit aeriis quantum dea nubibus ignis,\nesse senescentis sibimet dispendia mensis\nilla docet, quibus in rutili confinia fratris\ntertia uix mundo superest uia. Cum minus autem\numbrarum excludit, sunt tales quattuor ortus\nmarcentis lunae quales sub mense renato\nquattuor exsurgunt languentis luminis umbrae,\natque his octonas includunt ordine luces.\nInteriectorum numerum quoque nosse dierum\nprompta uia est: proprio semper dea proditur ore,\nscandat quanta polum, quotiens temone iuuencos\nstrinxerit et quanto iam tramite liquerit undas.\nAt decedentis postrema crepuscula noctis\nbis sex signa tibi, quae uersat signifer orbis,\nmonstrabunt: cursu nam Phoebus singula mutat\nsemper et alterno succedit in omnia lapsu.\nConficiens iter aetherium, nunc igneus istud\nastrum adolet flammis, alii nunc aurea Titan\nlumina miscetur, uel cum deuexus in undas\nlabitur et rebus formam absumpsere tenebrae,\nuel matutino redit incunabula linquens\ncum pelago et rebus suffudit luce colores.","prev":{"citation":"Aratea 1272-1313","label":"Lines 1272-1313","url":"https://interlinea.aeterna-institute.org/library/latin/avienus/aratea/1272","api":"https://interlinea.aeterna-institute.org/api/v1/library/latin/avienus/aratea/1272"},"next":{"citation":"Aratea 1362-1404","label":"Lines 1362-1404","url":"https://interlinea.aeterna-institute.org/library/latin/avienus/aratea/1362","api":"https://interlinea.aeterna-institute.org/api/v1/library/latin/avienus/aratea/1362"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}