{"kind":"section","lang":"la","language":"Latin","title":"Aratea 1362-1404","citation":"Avienus, Aratea 1362-1404","ref":"1362","level":null,"urn":null,"url":"https://interlinea.aeterna-institute.org/library/latin/avienus/aratea/1362","api":"https://interlinea.aeterna-institute.org/api/v1/library/latin/avienus/aratea/1362","markdown":"https://interlinea.aeterna-institute.org/library/latin/avienus/aratea/1362.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":279,"text":"Sic diuersa diem comitantur sidera semper.\nNon ego nunc longo redeuntia sidera motu\nin priscas memorem sedes: habet ista priorum\npagina, et incerta rerum ratione feruntur.\nNamque Solon hiberna nouem putat aethere uolui\nut luna <in> spatium redeat uetus, Harpalus ipsam\nocius in sedes momentaque prisca reducit,\nillius ad numeros prolixa decennia rursum\nadiecisse Meton Cecropea dicitur arte\ninseuitque animis; tenuit rem Graecia sollers\nprotinus et longos inuentum misit in annos.\nSed primaeua Meton exordia sumpsit ab anno\ntorreret rutilo cum Phoebus sidere Cancrum,\ncingula cum ueheret pelagus procul Orionis\net cum caeruleo flagraret Sirius astro.\nHoc ut fonte Meton deduxit tempora lunae,\nnauita quo longum facili rate curreret aequor\net quo ruris amans telluri farra parenti\ncrederet: ingenti petat haec indagine semper\nseu qui uela salo, seu qui dat semina terrae.\nNec mora discendi, breuis huc labor et breue tempus\nposcitur, innumeros habet autem industria fructus.\nVtilitas te certa manet, praenoscere motus\nsi libet aerios et tempestatibus ipsis\nedere principium: te primum sponte procellis\narcebis rapidis, te rursum principe fluctus\nuitabunt alii, si certis singula signis\ntempora discernas. Nam mundi cardine uerso\nut stata raucisoni redit indignatio ponti:\nsaepe etenim, quamquam tranquillae noctis amictu\nmitia protenti requiescant terga profundi,\ndoctus securam subducit ab aequore classem\nnauita et actaea retinet statione phaselum,\ncum matutinae praesensit signa procellae.\nNamque alias caelo cum tertia lumina Phoebus\nexserit, ille sali furit implacabilis horror\nadfore quem pelago comitem sibi dixerat astrum.\nCrebro quinta dehinc lux commouet Amphitriten,\nsaepe inopina mali clades ruit. Omnia certis\nindiciis tibi luna dabit, seu lucis utrimque\ncaesa facem, seu cum teretem concrescit in orbem.\nSol quoque uenturas aperit tibi saepe procellas,\nsidera producens et cum sale sidera condit.","prev":{"citation":"Aratea 1314-1361","label":"Lines 1314-1361","url":"https://interlinea.aeterna-institute.org/library/latin/avienus/aratea/1314","api":"https://interlinea.aeterna-institute.org/api/v1/library/latin/avienus/aratea/1314"},"next":{"citation":"Aratea 1405-1453","label":"Lines 1405-1453","url":"https://interlinea.aeterna-institute.org/library/latin/avienus/aratea/1405","api":"https://interlinea.aeterna-institute.org/api/v1/library/latin/avienus/aratea/1405"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}