{"kind":"section","lang":"la","language":"Latin","title":"Aratea 138-190","citation":"Avienus, Aratea 138-190","ref":"138","level":null,"urn":null,"url":"https://interlinea.aeterna-institute.org/library/latin/avienus/aratea/138","api":"https://interlinea.aeterna-institute.org/api/v1/library/latin/avienus/aratea/138","markdown":"https://interlinea.aeterna-institute.org/library/latin/avienus/aratea/138.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":334,"text":"Inter utramque dehinc praeclari nominis Arcton,\nceu circumflexo sinuantur flumina lapsu,\nsquameus agmen agens Draco uoluitur, atque obit ambas\nspirarum curuis anfractibus. Hunc quoque, ut artus\nlongius effusum spatiosa uolumina tendunt,\ncompta Lycaoniis includunt Plaustra choreis.\nQua caput est Helices, fundunt sese ultima monstri\nagmina, et hac caeli uix cauda in parte quiescit.\nAltera, qua spirae sinus est, sublime reponit\nuerticis et, curuo ceu circumclusa Dracone,\nin dorsum alterius dorso iacet. Anguis ob ora\nuertitur ac, longe postremam lapsus in Arcton,\nrursum maioris repetit confinia signi.\nNec quae stella caput flammarum insignit honore,\nsola micat, solaue rubent incendia crista,\nsed saetosa duplex adolet duo tempora fulgor,\net duo sub geminis oculi fulgoribus ardent.\nVnicus ignis item mento aestuat, ipsaque forma\nuerticis, in nutum ueluti curuata parumper,\nflectitur atque Helices caudam spectare uidetur.\nCuius in extremum spatio propiore per aethram\nsibila protenti succedunt ora Draconis.\nQuin super illa etiam, summae confinia caudae,\nqua per dimensos demittitur ordo meatus,\nstella subit dextri quae temporis igne coruscans\naemula uicinis accendit lumina flammis.\nAt decliue caput uertexque obliquior astri\nhac in parte sacri procumbere cernitur axis\nqua pater Oceanus, rutili reparator Eoi,\noccasus ortusque salo moderante coercet\net gemina alternae miscet diuortia metae.\nInde pruinoso si lumen abusque Dracone\nin conuexa feras, oculosque in proxima mundi\ndeclines, qua parte globo tumet altior orbis,\nilla laboranti similis succedet imago\nprotinus, expertem quam quondam dixit Aratus\nnominis, et cuius latuit quoque causa laboris:\nPanyasi sed nota tamen, cui longior aetas\neruit excussis arcana exordia rebus.\nNam dura immodici memorat sub lege tyranni\nAmphitryoniaden primaeuo in flore iuuentae,\nqua cedunt medii longe secreta diei,\nHesperidum uenisse locos atque aurea mala,\ninscia quae lenti semper custodia somni\nseruabat, carpsisse manu, postquam illa nouercae\ninsaturatae odiis serpens uictoris ab ictu\nspirarumque sinus et fortia uincula laxans\noccubuit; sic membra genu subnixa sinistro\nsustentasse ferunt, sic insedisse labore\ndeuictum fama est. At cum Tirynthius aethrae\ninditus et solio fultus sublime paterno est,\nIuppiter hanc speciem, miseratus acerba laborum,\nreddidit et talem cerni permisit Olympo.","prev":{"citation":"Aratea 93-137","label":"Lines 93-137","url":"https://interlinea.aeterna-institute.org/library/latin/avienus/aratea/93","api":"https://interlinea.aeterna-institute.org/api/v1/library/latin/avienus/aratea/93"},"next":{"citation":"Aratea 191-237","label":"Lines 191-237","url":"https://interlinea.aeterna-institute.org/library/latin/avienus/aratea/191","api":"https://interlinea.aeterna-institute.org/api/v1/library/latin/avienus/aratea/191"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}