{"kind":"section","lang":"la","language":"Latin","title":"Aratea 1405-1453","citation":"Avienus, Aratea 1405-1453","ref":"1405","level":null,"urn":null,"url":"https://interlinea.aeterna-institute.org/library/latin/avienus/aratea/1405","api":"https://interlinea.aeterna-institute.org/api/v1/library/latin/avienus/aratea/1405","markdown":"https://interlinea.aeterna-institute.org/library/latin/avienus/aratea/1405.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":302,"text":"Nec minus ex aliis aderit cognoscere motus\naequoris et magnos caeli callere tumultus,\nquos det certa dies, qui longi tempore mensis\nastrorumque uice et mundi ratione trahantur.\nAeris immadidi quiddam tellure creatum\nspiramenta uomunt. Vis hoc cum fudit in auras\nuenarum, occulte patulo praetexitur agro\ninsubiectum oculis, terramque supernatat omnem\nuuida materies; quam cum calor ignicomantum\nhausit stellarum, superas subducit in auras\net concreta diu compingit nubila mundo.\nSi minor haec madidi substantia caespite ab imo\nsubrigitur, tenues nebulae caligine fusa\ntenduntur caelo. Vis autem siccior olli\ncum fuit, in celeres dissoluitur undique uentos\nuicinumque sibi flabris dominantibus ultro\naera propellit. Si maior protinus umor\nconsurrexit humo, pluuias quoque nubila fundunt;\net pluuiis late calor est pater: hic super imbres\nexprimit et ductum feruentis ut obice mundi\nrespuit umorem. Si moles magna utriusque\noccurset sibimet uelut obuia, comminus acer\ncompulsu aerio fragor intonat amplaque late\nmurmura discurrunt pariter crepitantibus auris.\nHic inflictus item diuersorumque per aethram\nsaepe superne furens illisio fulguris ignes\nexcudit rutili, totamque uolantibus aethram\npraestringit flammis et caelum sulpure odorat.\nOmnibus his genetrix tellus, et caespite ab imo\nducuntur superi motus. Ipsa ignea mundi\nlumina, flammigero Phoebus temone coruscans\net quae noctiuagos attollit Luna iuuencos,\nhis peperere malis exordia. Namque deorum\nmouit humum cum forte calor, laxata repente\nspiramenta soli uenas procul altaque pandunt\nuiscera telluris; bibit imum terra calorem\ndesuper et madidum tepefactus caespes anhelat.\nAeris hos motus rabiemque uolubilis undae,\nflabra procellarum, mundani tramitis iras\npraesentire decet. Cape sollers singula mente,\npraeceptisque uirum sitientia pectora pande.\nCynthia cum primum caelo noua cornua promit,\ncautus utrimque deam circumspice. Namque reuectae\nnequaquam semper similis lux imbuit ortum,\nsed species diuersa trahit uarioque notatur\nformarum, primi cum surgit luminis igne,\ntertia cum rutilat, cum maior sideris aethram\nscandit et aerias quarta face luminat oras:\ningredientis erit plene tibi nuntia mensis.","prev":{"citation":"Aratea 1362-1404","label":"Lines 1362-1404","url":"https://interlinea.aeterna-institute.org/library/latin/avienus/aratea/1362","api":"https://interlinea.aeterna-institute.org/api/v1/library/latin/avienus/aratea/1362"},"next":{"citation":"Aratea 1454-1496","label":"Lines 1454-1496","url":"https://interlinea.aeterna-institute.org/library/latin/avienus/aratea/1454","api":"https://interlinea.aeterna-institute.org/api/v1/library/latin/avienus/aratea/1454"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}