{"kind":"section","lang":"la","language":"Latin","title":"Aratea 1454-1496","citation":"Avienus, Aratea 1454-1496","ref":"1454","level":null,"urn":null,"url":"https://interlinea.aeterna-institute.org/library/latin/avienus/aratea/1454","api":"https://interlinea.aeterna-institute.org/api/v1/library/latin/avienus/aratea/1454","markdown":"https://interlinea.aeterna-institute.org/library/latin/avienus/aratea/1454.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":276,"text":"Haec castigato si tertia fulserit ortu\npura sit ut foedis ab sordibus, adfore dicet\nclara serena diu; tenui surrexerit autem\nsi face et ignito suppinxerit ora rubore,\nturbida certantes conuerrent aequora Cauri.\nLuminis ista dehinc si crassior atque retunsis\ncornibus ingreditur sic quarti sideris ortum\npercussi ut tenuem protendat corporis umbram,\nimbribus aut Zephyris hebetabitur, arguet ultro\nflabra Noti aut pluuias: nam crassus desuper aer\ncornua caeca premit, Notus uuidus aera cogit.\nTertia si rursum protollat Cynthia currus\nsic subrecta faces et acumina tenta coruscans\nut nec curua quasi declinet cornua nec se\nfusa supinato diducat lumine in auras,\nocciduo Zephyrum praedicet surgere mundo\naut Libyae de parte Notum. Sin quattuor autem\nCynthia curriculis caelum subit atque coruscis\ncornibus immodice prostantibus exserit ignes,\nuis prolixa salum ciet, ocius omnia Cauri\nmarmora conuoluent, fera uerrent flabra profundum.\nIstius in Borean quod se sustollit acumen,\nsi curuum specie uelut adnuat, adfore caelo\nsaeua procellosi praedicet flabra Aquilonis:\nnamque hoc urgeri sese adserit hocque grauari,\nsummati et uento docet inclinarier alta.\nIndice rursus eo ueniet Notus, hanc ubi partem\npone supinari conspexeris inque reclinem\nsponte habitum pandi: nam subrigit Auster acumen\ninferiore plaga. Si lunam tertius ortus\nproferat atque deae conuoluat circulus oras\nsuffusus rutilo, mox tempestate sonora\nspumosum late pelagus canescere cernes;\nmaior et haec rauci uersabit gurgitis undas,\nipsa quoque immodice si uultum luna rubescat.\nContemplator item, seu plenum luminis orbem\nCynthia distendit, seu cum teres ambitus olli\ncaeditur et mediae uelut indiga lucis utrimque\nsustinet obductae sibimet dispendia formae,\ncornua prima replens et cornua fessa dehiscens.\nInduit et qualem procedens ore colorem,\nhunc perpende oculis, ipso monitore dierum\nsigna tene ac totum discerne in tempora mensem.","prev":{"citation":"Aratea 1405-1453","label":"Lines 1405-1453","url":"https://interlinea.aeterna-institute.org/library/latin/avienus/aratea/1405","api":"https://interlinea.aeterna-institute.org/api/v1/library/latin/avienus/aratea/1405"},"next":{"citation":"Aratea 1497-1542","label":"Lines 1497-1542","url":"https://interlinea.aeterna-institute.org/library/latin/avienus/aratea/1497","api":"https://interlinea.aeterna-institute.org/api/v1/library/latin/avienus/aratea/1497"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}