{"kind":"section","lang":"la","language":"Latin","title":"Aratea 1497-1542","citation":"Avienus, Aratea 1497-1542","ref":"1497","level":null,"urn":null,"url":"https://interlinea.aeterna-institute.org/library/latin/avienus/aratea/1497","api":"https://interlinea.aeterna-institute.org/api/v1/library/latin/avienus/aratea/1497","markdown":"https://interlinea.aeterna-institute.org/library/latin/avienus/aratea/1497.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":285,"text":"Non unum deprensa diem tibi signa loquuntur\nnec uulgo in cunctis adsunt praecepta diebus;\nsed quae signa nouo dederit mox tertia motu\nquartaue, sustollat medios dum Cynthia uultus,\ndurabunt caelo, medio quae dixerit ore\nignis in plenos. Hinc in dispendia rursus\naltera prouisae signantur tempora lunae;\nilla dehinc, donec germani luminis ignis\naccedat Phoebe, mensis postrema notabunt.\nHoc quod protento uehit ingens mundus inani\naera nomen habet; quod spirat caespite tellus\nnubila dicuntur. Caelum super, aula deorum,\naxe adamanteo conuoluitur. Hic sua certis\nsunt loca numinibus: Borealis uerticis altum\nregia Saturni; qua siccior annus anhelat\naestatis rutilo, calida stat Iuppiter aethra;\nimmodicus terram qua desuper ignis adurit,\nGradiuo incolitur; brumalis pulsus habenas\nqua Solis redigit, pulchro Venus obtinet astro;\nast ubi demerso latet ater circulus orbe,\ncessit Mercurio locus umbrifer. His super amplas\nquinque tenet zonas certo <et> uia feruida Solis\nlimite decurrit; tum Lunam nubila propter,\nexhalantis humi qua spiramenta madescunt,\nima uehunt caeli. Lux it dum fracta frequenter\ndesuper in nubes rutilantis lampade lunae\npascitur umore et uarias dea lumine formas\nexprimit inserto: sic crebro denique Phoebe\nnubibus ambiri, cum subsint nubila lunae,\ncreditur. Hanc quotiens includere circulus ergo\nspectatur, proprio succedunt ordine signa:\nille alias trino conuoluit tramite lunam\net geminus plerumque meat, solet unicus idem\ncingere. Si simplex circumuersabitur orbem,\nsigna procellarum certissima, signa sereni\npraeferet; abruptus subitos praenuntiat Euros;\nmarcescens tenui sensim caligine et aethra\ndigestus patula, docet undis adfore pacem.\nSi duo se lunae circumfudere, repente\nmaxima uis pontum, uis uerret maxima terras;\nmaioresque dehinc agitabunt stagna procellae\nsi trinus rutilum constrinxerit ambitus orbem,\net magis immodica formidine saeuiet Auster,\nzonarum taeter fuerit si tractus in aethra.\nDenique disrumpant si sese cingula lunae,\nultima tempestas ruet imi gurgitis aestum.","prev":{"citation":"Aratea 1454-1496","label":"Lines 1454-1496","url":"https://interlinea.aeterna-institute.org/library/latin/avienus/aratea/1454","api":"https://interlinea.aeterna-institute.org/api/v1/library/latin/avienus/aratea/1454"},"next":{"citation":"Aratea 1543-1585","label":"Lines 1543-1585","url":"https://interlinea.aeterna-institute.org/library/latin/avienus/aratea/1543","api":"https://interlinea.aeterna-institute.org/api/v1/library/latin/avienus/aratea/1543"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}