{"kind":"section","lang":"la","language":"Latin","title":"Aratea 1543-1585","citation":"Avienus, Aratea 1543-1585","ref":"1543","level":null,"urn":null,"url":"https://interlinea.aeterna-institute.org/library/latin/avienus/aratea/1543","api":"https://interlinea.aeterna-institute.org/api/v1/library/latin/avienus/aratea/1543","markdown":"https://interlinea.aeterna-institute.org/library/latin/avienus/aratea/1543.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":275,"text":"Solis quin etiam, solis tibi cura uidendi\nsit potior: solem melius praeuisa sequuntur\nastrorumque duci monstrata tenacius haerent,\nsiue ille occiduas uergat decliuis in undas,\nseu se luciferis reparabilis exserat oris.\nIstius ingentes radii caliginis atrum\net nebulosarum tractus piceos tenebrarum\nlumine dissiciunt, cum per chaos umbriferum uis\nflammea peruasit, cum se per noctis amictus\ninserit aeriae fulgor facis. Ille calore\npigra mouet, stimulat rutilis torpentia flammis;\nSol sopita animat, Sol dura obstacula primus\ncurru adamanteo reserat pater: efflua Phoebus\nigne inhibet, Phoebus radiis densata relaxat.\nAt cum flammigeri cedit uis inclita solis\nlucis egens, crassaeque deus latet obice nubis,\net caelo et pelago magnos ait adfore motus.\nNon hic, cum primos educet gurgite uultus,\nceu picturato diuersos ore colores\nproferat! Haud etenim tali tibi sole reuecto\nmitia iam caeli fas expectare serena.\nAt si tranquillo conuexa cocurrerit astro\nindideritque facem ponto deus integer, ora\nnube carens purusque comas et splendidus orbe,\nconuenit Eoae pacem praesumere lucis.\nSed non ora cauo similis medioque recedens\norbe quasi uel si radios discingitur ultro\nfigat ut australem porrecto sidere partem\nac Borean rigidi iaculetur luminis igne,\net uento et pluuiis reparata in luce carebit.\nDenique per flammas procul adque incendia sollers\nipsa dei, cedunt blandi si lumina solis,\ntende oculos - certa hoc ducentur signa magistro -,\net ne sanguineus late rubor imbuat ora,\nqualia protractu uaga nubila saepe rubescunt,\naut ne liuenti piceus color abdat amictu\nlampada, quaere diu. Si taetro crassior orbe est,\nuuescet pluuiis tellus, inflataque celsas\naggere deuicto superabunt flumina ripas;\nignea si fulgor percurrit plurimus ora,\nflamina crebra salis quatient uada, flamina terras\nconuerrent omnis et duri flabra Aquilonis\nsiluarumque comas et celsa cacumina flectent;","prev":{"citation":"Aratea 1497-1542","label":"Lines 1497-1542","url":"https://interlinea.aeterna-institute.org/library/latin/avienus/aratea/1497","api":"https://interlinea.aeterna-institute.org/api/v1/library/latin/avienus/aratea/1497"},"next":{"citation":"Aratea 1586-1635","label":"Lines 1586-1635","url":"https://interlinea.aeterna-institute.org/library/latin/avienus/aratea/1586","api":"https://interlinea.aeterna-institute.org/api/v1/library/latin/avienus/aratea/1586"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}