{"kind":"section","lang":"la","language":"Latin","title":"Aratea 1586-1635","citation":"Avienus, Aratea 1586-1635","ref":"1586","level":null,"urn":null,"url":"https://interlinea.aeterna-institute.org/library/latin/avienus/aratea/1586","api":"https://interlinea.aeterna-institute.org/api/v1/library/latin/avienus/aratea/1586","markdown":"https://interlinea.aeterna-institute.org/library/latin/avienus/aratea/1586.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":308,"text":"uis simul amborum si uultum solis oberret,\ncuncta Noti quatient, imbres procul arua rigabunt.\nEcce alias, primo nascentis solis in ortu\nuel cum praecipites pelago deus inserit ignes,\nut coeunt radii nebuloso - cetera quippe\npars Hyperioniae rutilat facis, hicque comarum\nuis confusa micans mundo sua lumina praestat,\nhic globus ater item liuentia nubila cogit -;\nnonnumquam crasso nebularum tectus amictu\nin conuexa redit; tum caelo rursus aperto\ncum ruit, opposita uultum caligine condit:\nomnibus his signis in terram defluet imber\nplurimus. Interdum tenuis praeuertere nubes\nuisa deum: haec celeri si praesurrexerit ortu\nipseque pone sequens radiorum luce carere\ncernatur, nimbis ingentibus arua madebunt.\nAt matutini si Phoebum litoris acta\nmaiorem solito produxerit atque per aethram\nmarcenti similis diffluxerit extimus orbis,\nalta dehinc scandens minuat iubar igniferum sol,\npura serena aderunt: namque olli gurgitis aer\ncrassior immodicum <primo> diffuderat orbem,\net iam se tenero sustollens tramite caeli\noblitum iusti iubar attrahit. Hic quoque, magnis\ncum madefacta dies sub tempestatibus horret,\npallidus ora cadens promittit pura serena:\ndisplosis etenim per apertam nubibus aethram\nora laboranti similis languentia pallet,\nat disiectarum moles late nebularum\nindicat exuti faciem clarescere mundi.\nQuin nascente die uenturos conuenit imbres\nnoscere, cum proni procul ad confinia caeli\ndeferri piceo spectaris nubila tractu;\net cum declinant radii se partem in utramque\nlucis in occasu, nox ut serat algida rores,\nimber erit. Puras si Phoebus condat habenas\net Calpetano tranquillum gurgite lumen\ntinguat, at illapsum nubes ignita sequatur,\nnoxque diesque dehinc uenturi rursus Eoi\nnimborum expertes et tempestatibus atris\ndurabunt. Sed cum radiis marcentibus ardor\nlanguet et <heu!> tenui tenduntur acumine frustra\nPhoebei crines, nimbos aget atra procella,\ntalis et obducti cernetur forma diei\nqualem fraternos subtexens luna iugales\nlucem hebetat: subit haec superi sacra lumina solis\ninferior, mediaeque interstans lampadis orbe\narcet flammigerae radium facis. Haud tibi rursum,\ncum matutinos molitur Lucifer ortus,\nebria sanguineae subuoluant uellera nubes!","prev":{"citation":"Aratea 1543-1585","label":"Lines 1543-1585","url":"https://interlinea.aeterna-institute.org/library/latin/avienus/aratea/1543","api":"https://interlinea.aeterna-institute.org/api/v1/library/latin/avienus/aratea/1543"},"next":{"citation":"Aratea 1636-1678","label":"Lines 1636-1678","url":"https://interlinea.aeterna-institute.org/library/latin/avienus/aratea/1636","api":"https://interlinea.aeterna-institute.org/api/v1/library/latin/avienus/aratea/1636"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}