{"kind":"section","lang":"la","language":"Latin","title":"Aratea 1636-1678","citation":"Avienus, Aratea 1636-1678","ref":"1636","level":null,"urn":null,"url":"https://interlinea.aeterna-institute.org/library/latin/avienus/aratea/1636","api":"https://interlinea.aeterna-institute.org/api/v1/library/latin/avienus/aratea/1636","markdown":"https://interlinea.aeterna-institute.org/library/latin/avienus/aratea/1636.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":281,"text":"namque grauis caelo fundetur protinus imber.\nNec si, sole procul rutila inter stagna morante,\nemineant radii, radios quoque crassior umbra\ncontegat, ille dies pluuiis uentoque carebit.\nQuin erit imber item, si solem circulus ater\nambiat exortum; maior se denique nimbus\nurgebit caelo, maior sola perluet imber,\ncircumfusa deo si cingula nescia solui\nseruarint taetrae speciem torpentia molis.\nSaepe etiam Phoebo nubes percussa rubescit,\net meditata dei formam procul igne recepto\nconcipit effigiem simulato luminis orbe.\nId qua parte poli spectaueris, adfore ab ipsa\nparte tene uentos. Tamen haec, tamen omnia semper\ndecedente die melius uentura docebunt.\nConuenit hic etiam paruum Praesepe notare.\nId nubi nomen quae Cancro obuoluitur alto\nGraecia docta dedit. Duo propter denique Asellos\nsuspice, quorum alius septem uicina trioni\nastra adolet, tepidum procul alter spectat in Austrum.\nIn medio quod nube quasi concrescit adacta,\nid Praesepe uocant. Porro hoc Praesepe repente\nsi sese ex oculis procul auferat, ardeat autem\ncongruus aeriis late rubor ignis Asellis,\nnequaquam tenues agitabunt stagna procellae.\nAt si sideribus similis lux duret et illi\ntaetra sit effigies, ruet altis nubibus imber\nlenior et parco mox tellus rore madebit.\nSed Boreae si parte trucis uelut indiga iustae\nstella facis lento marcescere cernitur igne\net procul alterius iuba late flagrat Aselli,\nprotinus Aethiopum surget conuallibus Auster.\nAt regione Noti si lucem stella senescat,\nsaeuus Riphaeis Aquilo crepitabit ab oris.\nQuin et terrenis cape rebus certa frequenter\nsigna procellarum. Nam cum traxere tumorem\naequora prolixum, cum litora curua resultant\nsponte procul neque caeruleus colliditur aestus,\naut cum proceris uertex in montibus ultro\nperstrepit aerium, uentos instare docebunt.\nEt cum parua fulix trepido petit arua uolatu\nstagna sinens longasque iterat clangore querelas,\nindicat insanis freta mox canescere uentis.","prev":{"citation":"Aratea 1586-1635","label":"Lines 1586-1635","url":"https://interlinea.aeterna-institute.org/library/latin/avienus/aratea/1586","api":"https://interlinea.aeterna-institute.org/api/v1/library/latin/avienus/aratea/1586"},"next":{"citation":"Aratea 1679-1724","label":"Lines 1679-1724","url":"https://interlinea.aeterna-institute.org/library/latin/avienus/aratea/1679","api":"https://interlinea.aeterna-institute.org/api/v1/library/latin/avienus/aratea/1679"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}