{"kind":"section","lang":"la","language":"Latin","title":"Aratea 1679-1724","citation":"Avienus, Aratea 1679-1724","ref":"1679","level":null,"urn":null,"url":"https://interlinea.aeterna-institute.org/library/latin/avienus/aratea/1679","api":"https://interlinea.aeterna-institute.org/api/v1/library/latin/avienus/aratea/1679","markdown":"https://interlinea.aeterna-institute.org/library/latin/avienus/aratea/1679.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":291,"text":"Denique cum caelo tenduntur pura serena,\nsi ruitura polo sunt flamina, primus in ipsa\nmox picturati conuertit pectoris artus\nsturnus edax, premat ut tenui uis obuia plumas\net ne post tergum pateat penetrabilis Euro.\nLatipedemque anatem cernes excedere ponto\nsaepius et summa nebulam se tendere rupe,\niamque super latices florum uolitare senectam,\nstellarumque comas rumpi procul, aethere celso\ndecidere in terras, rutilarum spargere crines\nflammarum et longos a tergo ducere tractus:\ninde etiam uentos mox adfore praemonet usus.\nQuod si diuersis se passim partibus ignes\nexcutiant, uerret pelagus sine fine modoque\nturba procellarum, si duri limite ab Euri,\nsi regione Noti, si lenis parte Fauoni\naut de Bistonio mundi procul axe coruscat.\nVellera si caelo uolitent, si discolor Iris\ndemittat gemino se fornice, circulus albam\nsi stellam taeter uelut ambiat, aequora propter\nsi crepitent uolucres, si gurgite saepius alto\npectora mersentur, si crebro garrula hirundo\nstagna adeat, rutilae cum sint primordia lucis,\nsi repetunt ueterem ranae per stagna querelam,\nsi matutinas ululae dant carmine uoces,\nimproba si cornix caput altis inserit undis\nflumine terga rigans, si saeuit gutture rauco,\nplurimus abruptis fundetur nubibus imber.\nImber erit, latis cum bucula naribus auras\nconcipit, et late pluuiis sola cuncta madebunt,\ncum proprias sollers sedes formica relinquens\noua cauis effert penetralibus (aspera quippe\ntempestas gelidusque dies et frigidus aether\ninserit internis terrarum sedibus aestus),\npectora cum curuo purgat gallinula rostro,\nagmine cum denso circumuolitare uidetur\ngraculus et tenui cum stridunt gutture corui,\ncum procera salum repetit clangore frequenti\nardea, cum paruae defigunt spicula muscae;\net si nocturnis ardentibus undique testis\nconcrescant fungi, si flammis emicet ignis\neffluus aut lucis substantia langueat ultro,\nconuenit instantes praenoscere protinus imbres.\nDenique cum patulum torret Vulcanus aenum,\nscintillas flamma circumlambente relinquit\nsi Notus humentis Libyco trahit aethere nubes.","prev":{"citation":"Aratea 1636-1678","label":"Lines 1636-1678","url":"https://interlinea.aeterna-institute.org/library/latin/avienus/aratea/1636","api":"https://interlinea.aeterna-institute.org/api/v1/library/latin/avienus/aratea/1636"},"next":{"citation":"Aratea 1725-1773","label":"Lines 1725-1773","url":"https://interlinea.aeterna-institute.org/library/latin/avienus/aratea/1725","api":"https://interlinea.aeterna-institute.org/api/v1/library/latin/avienus/aratea/1725"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}