{"kind":"section","lang":"la","language":"Latin","title":"Aratea 1774-1819","citation":"Avienus, Aratea 1774-1819","ref":"1774","level":null,"urn":null,"url":"https://interlinea.aeterna-institute.org/library/latin/avienus/aratea/1774","api":"https://interlinea.aeterna-institute.org/api/v1/library/latin/avienus/aratea/1774","markdown":"https://interlinea.aeterna-institute.org/library/latin/avienus/aratea/1774.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":294,"text":"Quid maiora canam? Cinis <en> cinis ipse, repente\ncum coit, albenti nix terras uestit amictu.\nNix operit terras, rutilis ubi lumina prunis\nsumma rubent errantque breues caligine crassa\ninterius nebulae et denso iam fomes in igni\nmarcescit penitus. Pluuios mox arguet Austros\ninduit immodicis cum semet floribus ilex:\nindiga nam suci ligno natura rigenti est\net cum flore nouo, cum bracchia glande grauantur,\nuuentis caeli sibi nutrimenta latenter\nsponte operata docet. Quin et lentiscus amara\nindicium est pluuis. Ter fetum concipit arbos\nterque nouos genetrix fructus alit, ipsaque trino\nflore renidescens tria tempora prodit arandi.\nTer prorumpentis scillae teres erigitur flos,\nsulcandique solum ter monstrat tempus adesse.\nSic et crabronum rauca agmina si uolitare\nfine sub autumni conspexeris aethere longo,\niam uespertinus primo cum commouet ortus\nVergilias pelago, dices instare procellas.\nSique sues lentae, si lanae sedula nutrix,\nsi capra dumosis errans in saltibus ultro\nin uenerem pergat (quippe ollis uuidus aer\nexcitat internum per uiscera mota furorem),\net tempestates et nubila protinus atra\nadfore praecipies. Quin et gaudebit arator\nquisque solum iustis uersarit mensibus anni\nplebe gruum prima, gaudebit tardus arator\nagmine pigrarum, si quadam lege deorum\nhis comes est imber. Pecudes si denique terram\nlanigerae fodiant, caput at tendatur in Arctum,\ncum madidus <primum> per marmora turbida condit\nPleiadas occasus, cum brumae in frigora cedit\nfrugifer autumnus, ruet aethra concitus imber.\nAt ne perruptis terrarum dorsa lacunis\ninfodiant pecudes! Si uasto uiscera hiatu\ndiscutiant terrae, ueniet uis aethere toto\ndira procellarum, nix omnis uestiet agros,\nnix herbas laedet teneras, nix uret aristas.\nAt si contigerit plures ardere cometas,\ninualidas segetes torrebit siccior aer.\nNam quae prorumpunt naturae legibus ultro\nspiramenta soli, si iustus defuit humor,\narida, per caelum surgentia, desuper aethrae\nignescunt flammis, mundique impulsa calore\nexcutiunt stellas et crebro crine rubescunt.","prev":{"citation":"Aratea 1725-1773","label":"Lines 1725-1773","url":"https://interlinea.aeterna-institute.org/library/latin/avienus/aratea/1725","api":"https://interlinea.aeterna-institute.org/api/v1/library/latin/avienus/aratea/1725"},"next":{"citation":"Aratea 1820-1863","label":"Lines 1820-1863","url":"https://interlinea.aeterna-institute.org/library/latin/avienus/aratea/1820","api":"https://interlinea.aeterna-institute.org/api/v1/library/latin/avienus/aratea/1820"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}