{"kind":"section","lang":"la","language":"Latin","title":"Aratea 191-237","citation":"Avienus, Aratea 191-237","ref":"191","level":null,"urn":null,"url":"https://interlinea.aeterna-institute.org/library/latin/avienus/aratea/191","api":"https://interlinea.aeterna-institute.org/api/v1/library/latin/avienus/aratea/191","markdown":"https://interlinea.aeterna-institute.org/library/latin/avienus/aratea/191.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":287,"text":"En manus ipsa dei, uiolenta in uerbera pendens,\nerigitur, dextraeque dehinc impressio plantae\ntempora deculcat maculosi prona Draconis.\nPoplite succidui qua sideris ampla patescunt\nterga dehinc, uersumque iacet sublime umerorum,\naspice ceu rutilis uibret lux Gnosia flammis.\nHaec quondam Bacchi monumentum fulget amoris,\nhaec Ariadnaei capitis testatur honorem.\nTrina ter illustrant hanc lumina, parsque Coronae\nSerpentem uicina subit, qua sibila in Arcton\nora Draco inclinans stridit flabris Aquilonis;\npost tergum Nixi pars uoluitur, ac uelut haerens\nrursum defessi reseratur nuntia signi.\nIstius extremo sub uertice, uertice quippe\nsideris innixi clarum nosces Ophiuchum.\nTriccaei sidus stat numinis, et cui pingui\nture Epidaureae fumant altaria sedis.\nIn Styga decursis Parcarum ab origine fusis\nmerserat Hippolytum sors ultima, iamque per imas\nCocyti tenebras et stagna nigrantia Ditis\nportitor ille Charon Thesidae fata uehebat.\nHic immaturi sed enim miseratus acerbum\nleti supplicium Neptunique aspera iussa,\nalgentis artus Erebo procul intimo abusque\nsuscitat, atque animae rursum tepefacta calore\nuiscera mundanas reuocat medicator in oras.\nNon tulit omnipotens ortu cuiquam generato\nDeucalioneo fas esse nouissima fata\nuincere et incassum decurrere pensa sororum,\nmoxque trisulca polo iaculatus fulmina celso\net super aeriae uibrans incendia flammae,\nmorte repertorem medicinae audacis in umbras\ndeicit; at nato reparans solacia Phoebo\nasperaque extincti miseratus fata nepotis,\nsurgere nocturno iubet inter sidera motu.\nHic ergo insignis ardens uenas Ophiuchus,\nhic rigidos artus, formae Anguitenentis honore\narduus, hic tantos umeris uibrantibus ignes\neuomit ut, pleno cum luna nitescit in orbe\nmenstruaque ingenti iam tempora diuidit ortu,\nnequaquam lentis obscurior ex umeris lux\nmarceat. At manibus non compar flamma rubescit\n(nam suffusa leui resplendent ultima luce),\nsed cerni sunt prompta tamen, postremaque parco\nigne micant. Ille Angue manum consertus utramque\nerigitur, serpensque dehinc elabitur ambas\nflexilis et medium cingit spiris Ophiuchum;","prev":{"citation":"Aratea 138-190","label":"Lines 138-190","url":"https://interlinea.aeterna-institute.org/library/latin/avienus/aratea/138","api":"https://interlinea.aeterna-institute.org/api/v1/library/latin/avienus/aratea/138"},"next":{"citation":"Aratea 238-281","label":"Lines 238-281","url":"https://interlinea.aeterna-institute.org/library/latin/avienus/aratea/238","api":"https://interlinea.aeterna-institute.org/api/v1/library/latin/avienus/aratea/238"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}