{"kind":"section","lang":"la","language":"Latin","title":"Aratea 326-371","citation":"Avienus, Aratea 326-371","ref":"326","level":null,"urn":null,"url":"https://interlinea.aeterna-institute.org/library/latin/avienus/aratea/326","api":"https://interlinea.aeterna-institute.org/api/v1/library/latin/avienus/aratea/326","markdown":"https://interlinea.aeterna-institute.org/library/latin/avienus/aratea/326.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":298,"text":"\"Parcite, uile genus!\" lacrimis aiebat obortis,\n\"causa querelarum uestrum est scelus. Aurea quondam\niudice me uestri uixerunt saecla parentes;\ndegener in uobis animus, sollertia uobis\nperuigil, arte noua uitam traducere mos est,\nomne malum studiis excuditis. Hinc quoque rursum\n(pro pudor adque dolor!) nascetur uilior aetas\net lacerata genas ibit Bellona per urbes\nsaucia ut infidas agitent certamina mentis.\"\nHaec ubi per maestos rauco congesserat ore,\nalite procursu sese in conuexa ferebat\nprotinus, atque oculos fugiens exosa sequentum\nLinquebat coetus hominum. Ruit haec quoque rursum\nuiuendi series ac successere pudendo\naerea saecla habitu. Fraus ilicet et furor ardens\natque cruentus amor chalybis segnisque libido\net malesuada lucri rabies subit, omnia terror\ndegener ac maestae facies formidinis implet.\nSecreti immodicus uada gurgitis ultima uersat\nTiphys; Agenoreo color hinc mentirier ostro\nincipit Assyriumque bibunt noua uellera fucum,\nebria ut externo splendescat lana ueneno.\nSic iusta in populos mox Virginis inculpatae\nexarsere odia et caelum pernicibus intrat\ndiua alis spatiumque sibi, subuecta per auras,\nunde procul terras summa uix cerneret aethra,\npropter anhela libens late capit astra Bootis.\nIstius extremis umerorum partibus urget\nstella facem, qualique rubent incendia flamma,\nquae subiecta procul caudam maioris ad Vrsae\nuertice brumalis circumuoluuntur Olympi,\ntalis utrimque modo simul et fulgore micat lux.\nPlurima quippe procul clara fax ardet in Arcto,\nnec contemplandi labor anxius: omnia primis\nobuia ceu uibrant obtutibus. Unus ob ora,\nqua sunt prima ferae uestigia, praeminet ignis,\naltera, qua pedibus regio est clunalibus, ardet\nstella itidem, genibusque dehinc se tertia promit\naemula, qua rutilae flagrant confinia caudae.\nNon tamen his species, non sunt cognomina certa,\nsed permixta simul uulgi uice conuoluuntur.\nIlla quidem supero conserta relabitur axe,\ninscia piscosi semper salis; ipsius autem\nsubiectos capiti Geminos tibi cernere fas est,\nSpartanam, Geminos, subolem prolemque Tonantis\negregiam et proprio post reddita numina caelo.","prev":{"citation":"Aratea 282-325","label":"Lines 282-325","url":"https://interlinea.aeterna-institute.org/library/latin/avienus/aratea/282","api":"https://interlinea.aeterna-institute.org/api/v1/library/latin/avienus/aratea/282"},"next":{"citation":"Aratea 372-416","label":"Lines 372-416","url":"https://interlinea.aeterna-institute.org/library/latin/avienus/aratea/372","api":"https://interlinea.aeterna-institute.org/api/v1/library/latin/avienus/aratea/372"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}