{"kind":"section","lang":"la","language":"Latin","title":"Aratea 372-416","citation":"Avienus, Aratea 372-416","ref":"372","level":null,"urn":null,"url":"https://interlinea.aeterna-institute.org/library/latin/avienus/aratea/372","api":"https://interlinea.aeterna-institute.org/api/v1/library/latin/avienus/aratea/372","markdown":"https://interlinea.aeterna-institute.org/library/latin/avienus/aratea/372.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":284,"text":"Nam Lacedaemoniis, Mars cum caluisset Aphidnis,\nCastora Cecropii tulit inclementia belli.\nAt frater, lucemque et fata superstitis aeui\nexosus, sortem lacrimis efflagitat aequam.\nProtinus alternae germanos tempore uitae\nIuppiter attollit, caelique in celsa receptans\naeternae flagrare facis iubet ignibus ambo.\nAluo Helices Cancer subuoluitur, astraque Cancro\nIuno, nouercales ut semper proderet iras,\npraestitit. Hic etenim, Lernaei gurgitis hydram\nureret Alcides cum flammiger, ausus in ipsum\nrepere uictorem. Qua duro concaua dorso\ntegmina curuantur, geminus micat ardor in auras.\nHos dixere Asinos, ortos Thesprotide terra\net sidus, Lenaee, tuum; disterminat aer\ncrassior hos itidem qualis praesepibus esse\nforma solet. Dispar chelarum flamma coruscat:\nnamque tribus stellis adoletur dextera Cancro,\nlaeua duas pigro succendit fomite flammas.\nQua postrema pedum rutilant uestigia in Arcto,\nmaxima flammigeri mundus trahit ora Leonis.\nMembra dehinc, longi quae semet tramite caeli\nplurima protendunt, torrentur fomite acuto\nsingula et adsiduis ardet Leo uiscera flammis.\nHic Hyperionii flagrat uia Solis, et isto\nse duce caerulei referunt momenta caloris.\nTum succisa Ceres stabilito mergite culmi\nconstruitur, flauos tondentur semina crines\nomnia, et aduectas late coquit area messes.\nTunc et Threicii repetunt animosa Aquilones\nflabra polo, tunc coeaneum stata flamina caeli\npropellunt pelagus: longis hoc tempore in anni\notia sunt remis, pontus uehit ipse carinas.\nAurigatorem par sit quoque cura uidere:\nnamque tuas aures impleuit fabula sollers\nCretaei pecoris, sic lac memoratur alumno\ninfudisse Ioui; Capra, nutrix dicta Tonantis,\nstelligero subuecta polo est. Ille impiger autem\npulcher Erichthonius currus et quattuor olim\niunxit equos, pronus <qui non> procul in Geminorum\nlaeua iacet fusoque super se corpore tendit\nplurimus, atque Helices caput inclinatur ab ore.\nIlle quidem in spatium membra explicat, ut Capra laeuo\nfixa umero clare sustollitur, ipsius autem\nfine manus paruas Haedorum suspice flammas.","prev":{"citation":"Aratea 326-371","label":"Lines 326-371","url":"https://interlinea.aeterna-institute.org/library/latin/avienus/aratea/326","api":"https://interlinea.aeterna-institute.org/api/v1/library/latin/avienus/aratea/326"},"next":{"citation":"Aratea 417-463","label":"Lines 417-463","url":"https://interlinea.aeterna-institute.org/library/latin/avienus/aratea/417","api":"https://interlinea.aeterna-institute.org/api/v1/library/latin/avienus/aratea/417"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}