{"kind":"section","lang":"la","language":"Latin","title":"Aratea 417-463","citation":"Avienus, Aratea 417-463","ref":"417","level":null,"urn":null,"url":"https://interlinea.aeterna-institute.org/library/latin/avienus/aratea/417","api":"https://interlinea.aeterna-institute.org/api/v1/library/latin/avienus/aratea/417","markdown":"https://interlinea.aeterna-institute.org/library/latin/avienus/aratea/417.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":303,"text":"Qui postquam Oceano sese expediere sonoro,\nsaeua procellosis immittunt flabra fluentis,\nut spumosa truci pulsentur litora fluctu\net uaga caeruleas inuoluant aequora puppes.\nNec minus Aurigae qua sunt uestigia curui,\ncornigeri late tenduntur pectora Tauri.\nIllic saetosam pecoris perquirere frontem\nesto memor, flexo iacet illic crure, minaces\nin terram figens oculos. Non cetera signa\nflammarum similem procul inter sidera formam\nostentare ualent, gemino sic cornua ductu\nerigit aetherii rigor ignis, et ignis utrimque\nsic camuris ardet protractibus. Haud tibi signis\nperquirenda aliis pecoris frons aequore surget\nOceani: proprio Taurum deprenderis ore,\ncornua sic uera sub imagine curua dehiscunt,\nsic mediam creber pecori frontem asperat ignis,\nsic Hyades Tauri toto procul ore coruscant.\nAt Borean laeuo qua Taurus acumine pulsat,\ndesuper Aurigae dexter pes imminet astro:\nuna pedem Aurigae dextrum cornumque sinistrum\nstella tenet pecoris. Simul in conuexa feruntur,\nsed prior occidui Taurus subit aequoris undas.\nNec mea Musa senem tacitum Cephea relinquet:\nIasiden quoque summa poli Cephea reuoluunt,\nnon eget huius enim sedes sacra mominis. Illum,\nillum quin etiam rutilae pater intulit aethrae\ndonauitque polo. Tergo Cynosuridos Vrsae\npost habitat, geminasque manus a pectore tendit.\nAt diducta pedes tantum mensura seniles\ndiuidit, extrema quantum pede distat ab Vrsa.\nRursum decliui si uisum tramite uergas\nprima tibi ut flexi linquatur spira Draconis,\ninfortunatam spectabis Cassiepiam.\nSed nec multa tamen, cum caelum lumine toto\nLuna replet taetram ut superet fax aurea noctem,\noccurret genetrix oculis quaerentibus: absunt\nlucida maerenti, tenuis rubet ignis, et aegrae\nlux hebes est matri. Vix, qualem Caria quondam\nnouerat intrantem per claustra tenacia clauem,\nformatur stellis distantibus, inque umeros uix\ntenditur angustos: natae fera fata retundunt.\nNamque subest teretisque poli simul orbe rotatur\nAndromeda, ingenti quae semper luce coruscans\nsponte oculos in membra rapit. Face denique uertex\nardet anhelanti, geminamque per aera fundunt\nlucem umeri et summis lux aestuat ignea plantis.","prev":{"citation":"Aratea 372-416","label":"Lines 372-416","url":"https://interlinea.aeterna-institute.org/library/latin/avienus/aratea/372","api":"https://interlinea.aeterna-institute.org/api/v1/library/latin/avienus/aratea/372"},"next":{"citation":"Aratea 464-507","label":"Lines 464-507","url":"https://interlinea.aeterna-institute.org/library/latin/avienus/aratea/464","api":"https://interlinea.aeterna-institute.org/api/v1/library/latin/avienus/aratea/464"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}