{"kind":"section","lang":"la","language":"Latin","title":"Aratea 46-92","citation":"Avienus, Aratea 46-92","ref":"46","level":null,"urn":null,"url":"https://interlinea.aeterna-institute.org/library/latin/avienus/aratea/46","api":"https://interlinea.aeterna-institute.org/api/v1/library/latin/avienus/aratea/46","markdown":"https://interlinea.aeterna-institute.org/library/latin/avienus/aratea/46.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":313,"text":"Denique ne longum marcentia corda iacerent\nmundanique ortus mens immemor omnia sensim\nuilia conciperet neque se subduceret umquam\nfontis in aeterni primordia, quo, uelut amnis\nquem festina citis urget natura fluentis,\nlapsu continuo ruiturae in corpora nostra\nprorumpunt animae seriemque per aethera nectunt,\nhic primum Cnidii radium senis intulit astris\nmortalemque loqui docuit conuexa deorum:\ncur Hyperionios Nepa circumflecteret ignes\nautumni reditu, cur sub gelido Capricorno\nbruma pruinosi iuga tristia solueret anni,\ncur spatium lucis, madidae cur tempora noctis\nLibra celerque Aries dimenso pondere Olympi\naequarent, qua parte polus sublimior alto\ncardine caeruleas Thetidis non tangeret undas,\nquis polus umbrifero lateat decliuis in axe\net uaga palanti cur signa errore ferantur.\nQuae rursum ingenio numerisque Solensibus idem\nIuppiter efferri melius dedit, incola Tauri\nMusa ut Cecropios raperetur et Aonas agros.\nMe quoque nunc similis stimulat fauor edere uersu\ntempora cum duris uersare ligonibus arua\nconueniat, cum ueliuolo dare carbasa ponto\net cum uiticomo crinem tondere Lyaeo.\nO mihi nota adyti iam numina Parnasei!\nO per multa operum mea semper cura, Camenae!\nIam placet in superum uisus sustollere caelum\natque oculis reserare uiam per sidera. Maior,\nmaior agit mentem solito deus, ampla patescit\nCirrha mihi et totis se Helicon inspirat ab antris.\nOmnia quae flammis pingunt radiantibus aethram\nNox agit et uerso ceu fixa trahuntur Olympo.\nAt non cuncta tamen signorum in lege putanda:\npars numeris et honore caret. Micat omnibus ignis\net rutilo cunctis flagrat coma flammea crine,\nsed quia non certa formarum in luce notantur\nomnia, sideribus cassum fit cetera uolgus.\nMobilis en etiam mundi se machina uersat,\nponderis et proprii trahit inclinatio caelum.\nSed non axis item curui uertigine fertur\naetheris, ut stilus instabili conuoluitur orbi:\niuge manet, tenuisque procul sacra uiscera caeli\nperforat et mediae molem terrae tenet. Illum\nnon prolixa dies, non incumbentis Olympi\ncursus agit motatue loco labor, ut semel haerens\nconstitit et ferri se circum cuncta remisit.","prev":{"citation":"Aratea 1-45","label":"Lines 1-45","url":"https://interlinea.aeterna-institute.org/library/latin/avienus/aratea/1","api":"https://interlinea.aeterna-institute.org/api/v1/library/latin/avienus/aratea/1"},"next":{"citation":"Aratea 93-137","label":"Lines 93-137","url":"https://interlinea.aeterna-institute.org/library/latin/avienus/aratea/93","api":"https://interlinea.aeterna-institute.org/api/v1/library/latin/avienus/aratea/93"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}