{"kind":"section","lang":"la","language":"Latin","title":"Aratea 464-507","citation":"Avienus, Aratea 464-507","ref":"464","level":null,"urn":null,"url":"https://interlinea.aeterna-institute.org/library/latin/avienus/aratea/464","api":"https://interlinea.aeterna-institute.org/api/v1/library/latin/avienus/aratea/464","markdown":"https://interlinea.aeterna-institute.org/library/latin/avienus/aratea/464.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":288,"text":"Ignea quin etiam per caelum cingula flagrant\nAndromedae et toto uibrant in corpore flammae.\nSed tamen hic etiam uiuax est poena dolenti:\nnam diducta ulnas magna distendit in aethra\nuinculaque in caelo retinent quoque, tenuia quippe\nbracchia contortis adstringunt nubila nodis.\nRursus odorato qua uertex crine tumescit,\nAndromedae capiti suppingitur indiga pleni\naluus Equi. Summo quae fax in uertice uibrat\nuirginis inque auras coni uice surgit acuti,\nipsa sub absciso late micat aurea uentre\ncornipedis: simul hos lux indiscreta retentat,\ncommunique rubent duo semper sidera flamma.\nTris latus atque armos aliae pecori pinxere,\net spatio disiuncta pari fax aemula flagrat:\nplurimus ignis inest, uasto globus aestuat orbe.\nSed non et capiti similis rubor, ipsaque ceruix\n- quamuis procero surgat iuba maxima collo -\nlanguida marcenti uix est spectabilis igne.\nVltima quae mento sese explicat, haud minor illa\nquattuor est primis quae formam lumine claro\ncornipedis simulant. Non hic Equus integer artus,\nnon quadrupes caelo sustollitur, at tenus aluo\nerigitur media: nam cetera pone negantur,\net quatit aetherias primis modo cruribus auras.\nHunc, hunc Aonio quondam memorant Helicone\ninclita post Lyciae redeuntem bella Chimaerae,\nmystica qua rupes doctis obmurmurat antris,\nherbarum carpsisse comas et gramine odoro\nexpleuisse famem; sed cum sitis arida fauces\nureret ac nullo manaret gurges hiatu,\nillisisse pedem: cornuque excita repente\nlympha Camenalem fudit procul Hippocrenen\n(Aones hoc latici posuerunt nomen equino\npastores). Strepit haec placido inter saxa susurro,\nAtque Helicone cadens sese sitientibus herbis\ninserit, Ascraeas donec uaga gurgite ualles\nuuificet; rigat hac animas et Thespia pubes\nsemper et in latices inhiat gens fontis alumni.\nAst Equus alterno redit inter sidera motu,\nOceanique salo caput exserit. Haud tibi magni\ncura laboris erit caelo spectare sereno\ncornipedem: micat ille procul flagrantibus astris,\net perfusa recens educit pectora ponto.","prev":{"citation":"Aratea 417-463","label":"Lines 417-463","url":"https://interlinea.aeterna-institute.org/library/latin/avienus/aratea/417","api":"https://interlinea.aeterna-institute.org/api/v1/library/latin/avienus/aratea/417"},"next":{"citation":"Aratea 508-551","label":"Lines 508-551","url":"https://interlinea.aeterna-institute.org/library/latin/avienus/aratea/508","api":"https://interlinea.aeterna-institute.org/api/v1/library/latin/avienus/aratea/508"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}