{"kind":"section","lang":"la","language":"Latin","title":"Aratea 508-551","citation":"Avienus, Aratea 508-551","ref":"508","level":null,"urn":null,"url":"https://interlinea.aeterna-institute.org/library/latin/avienus/aratea/508","api":"https://interlinea.aeterna-institute.org/api/v1/library/latin/avienus/aratea/508","markdown":"https://interlinea.aeterna-institute.org/library/latin/avienus/aratea/508.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":291,"text":"Tum celer ille Aries, longi qui limitis orbe\naethera percurrens numquam Cynosuridos Vrsae\nsegnior ablapsu conuertitur, haud procul astro\nuisus Equi, magno celsum secat aera motu.\nParcior hic rutilae semper facis, indigus ignis\nspectatur iusti: nam quanti luminis astra\nesse solent aciem quibus aurea luna retundit,\nmarcida Lanigeri tantum se forma sub auras\nexserit, in tenui quamquam primordia Phoeben\norbe habeant nulloque decus dea proferat ore.\nSed licet hunc oculis frustra sectere per aethram\n(nam semper propriis caret ignibus), en tibi propter\nAndromedae claro rutilantia cingula in astro\nsuspectanda patent: uocat ingens balteus ultro\nquaerentem. Non longa Aries statione locatus\nin conuexa redit, paruo se tramite subter\ndistinet et medio caelum citus ordine currit,\nultima Chelarum qua bracchia, quaque corusco\ncirculus axe means rutilum secat Oriona.\nEst etiam Graio quod semper nomine nostri\nDeltoton memorant. Simile in latus istud utrumque\nporrigitur, summum signo caput angulus artat\net gemini suprema iugi uicinia mordet.\nTertia quae stantes sustentat linea ductus\nparcior haud simili sese sub limite tendit;\nat contracta modum geminas face flammigerarum\nstellarum superat. Quin et, quae subter in astro\nlanati marcent pecoris pluuioque tepescunt\niam uicina Noto, minor istaec linea luce\net fulgore facis praeuertitur; at locus olli\npost tergum Andromedae (sic se tulit ordo) dicatus.\nHinc si uicino flectaris lumina uisu\ninque Notum sensim Boreali ab cardine doctus\ninclinere oculos, proles tibi tertia Piscis\nsurget Bambycii: sedes data quippe duobus\nPiscibus, ingenti qua celsam circulus aethram\norbe secat, tendit qua pinnae extrema sinistrae\nales Equus, mundo qua pectora Laniger alto\nurget et auerso surgentem corpore Taurum\nrespicit. Hinc medio signantur sidere Pisces,\nquorum alius rigida consurgit in aera forma\ncelsior et Borean propior subit, alter aquarum\nTroicus aurata quas fundit ephebus ab urna\npone auidus iacet in Notialia nubila pronus.","prev":{"citation":"Aratea 464-507","label":"Lines 464-507","url":"https://interlinea.aeterna-institute.org/library/latin/avienus/aratea/464","api":"https://interlinea.aeterna-institute.org/api/v1/library/latin/avienus/aratea/464"},"next":{"citation":"Aratea 552-597","label":"Lines 552-597","url":"https://interlinea.aeterna-institute.org/library/latin/avienus/aratea/552","api":"https://interlinea.aeterna-institute.org/api/v1/library/latin/avienus/aratea/552"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}