{"kind":"section","lang":"la","language":"Latin","title":"Aratea 598-644","citation":"Avienus, Aratea 598-644","ref":"598","level":null,"urn":null,"url":"https://interlinea.aeterna-institute.org/library/latin/avienus/aratea/598","api":"https://interlinea.aeterna-institute.org/api/v1/library/latin/avienus/aratea/598","markdown":"https://interlinea.aeterna-institute.org/library/latin/avienus/aratea/598.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":309,"text":"Quin Meropen, adiit postquam Sisypheia uincla\net thalamos saeuo sortita est omine diuum,\nindignam aeria credunt mage sede fuisse.\nSic anceps numeri fit fabula, sexque per aethram\nVergilias cerni tenet usus, sed simul omnis\nartauere globum. Ter in auras angulus exit\nflammiger, et mixtis Atlantides ignibus ardent.\nNec tamen est famae similis uigor: ampla sorores\nfabula nobilitat, modus ollis parcus, et ignis\nuix tenui longe face fit spectabilis. Istas,\nalterno redeunt cum bina crepuscula mundo,\nseu nox astrales adolet cum caerula flammas,\nseu matutinus cum sidera dissicit ortus,\nconuolui caelo summae pater adnuit aethrae.\nNec minus, arenti cum crine attollitur aestas\net cum cana comas redit anno bruma rigenti,\ntempora dissignant. Nam si se gurgite tollunt\nVergiliae, curuas in flaua noualia falces\nexercere dies; si condunt aequore flammas,\ntellurem presso proscindere tempus aratro.\nEst Chelys illa dehinc, tenero quam lusit in aeuo\nMercurius curua religans testudine chordas\nut Parnaseo munus memorabile Phoebo\nformaret neruis opifex deus. Hanc ubi rursum\nconcentus superi compleuit pulcher Apollo,\nOrphea Pangaeo docuit gestare sub antro.\nHic iam fila nouem docta in modulamina mouit\nMusarum ad speciem Musa satus (ille repertor\ncarmina Pleiadum numero deduxerat). At cum\nimpia Bassaridum carpsisset dextera uatem\net deuota uirum tegerent Libethra peremptum,\nintulit hanc caelo miseratus Iuppiter artem\npraestantis iuuenis, pecudes qui et flumina uates\nflexerat. Adnixi qua semet sidera porro\nsustollunt, laeuum propter Chelys haec femur adstat.\nAduolat ast aliud latus Ales et ora canoros\ntenditur ad neruos: media est Lyra sede dicata,\nCygneo capiti et curuo contermina signo.\nNamque et sidereis Cycnus secat aethera pinnis,\ndonatus caelo, non claro lucidus astro,\nsed tamen os flagrans et guttura longa coruscans;\ngrandibus haud equidem stellis, non hic tamen atris\nobscurisue micat. Trahit in conuexa uolatum\nperfacilem, et dextro late Cepheida dextram\nradens remigio, summa ad uestigia laeuo\ndeclinatur Equi. Sic magno praepes Olympo\nsubuehitur, subit occidui sic marmoris undas.","prev":{"citation":"Aratea 552-597","label":"Lines 552-597","url":"https://interlinea.aeterna-institute.org/library/latin/avienus/aratea/552","api":"https://interlinea.aeterna-institute.org/api/v1/library/latin/avienus/aratea/552"},"next":{"citation":"Aratea 645-688","label":"Lines 645-688","url":"https://interlinea.aeterna-institute.org/library/latin/avienus/aratea/645","api":"https://interlinea.aeterna-institute.org/api/v1/library/latin/avienus/aratea/645"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}