{"kind":"section","lang":"la","language":"Latin","title":"Aratea 689-735","citation":"Avienus, Aratea 689-735","ref":"689","level":null,"urn":null,"url":"https://interlinea.aeterna-institute.org/library/latin/avienus/aratea/689","api":"https://interlinea.aeterna-institute.org/api/v1/library/latin/avienus/aratea/689","markdown":"https://interlinea.aeterna-institute.org/library/latin/avienus/aratea/689.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":309,"text":"Quin norunt aliam superum conuexa Sagittam;\nsed tamen haec arcu tereti caret: inscia nerui,\ninscia nam domini est. Telum super aduolat Ales,\nAles Olor; sed Threicio conterminus axi\ncana pruinosas extendit colla sub Arctos.\nArmiger hanc etiam Iouis aduolat, arbiter ignis\naetherii, sed membra minor. Procul hic tamen alto\ncum redit ac pelago mouet in conuexa uolatum\nfine tenebrarum summaeque in margine noctis,\nspumosum late mare subruit: omnia caeli,\nomnia terrarum mox flabra procacia uerrunt.\nTum curuus caudam subit inter sidera Delphis,\ndux, Neptune, tui quondam super aequor amoris.\nHic nam detrusae in latebras procul Amphitrites,\narduus occiduos umeris ubi sustinet axes\nPleiadum genitor, perruperat. Hic uagus omni\ngurgite dilectam domino maris ultimo ab orbe\nmollis dorsa tulit. Breue signo corpus in astris\net super auritum ponto surgit Capricornum.\nHic medios artus taeter stupet, altera porro\nquattuor illustrat facibus rubor aureus, atque\nbis gemino discreta situ micat ignipotens lux.\nOmnia quae soli et rigido interfusa Aquiloni\naetheris incurui moles rotat, inque frequentes\noccasus ortusque trahit moderator Olympus,\nsunt digesta mihi. Quae rursum limite ab usque\nsese Hyperionio pluuialis concaua in Austri\ndemittunt, taetram donec Notus ambiat aethram,\ndicere Romuleo conitor carmine sollers.\nSubtrahit obliquo qua sese circulus orbe\nsignifer in Borean, australes deserat umbras\nut medii iam mole poli, fera pectora Tauri\nsuspicit Orion; neque quisquam nocte serena\ntransierit: celso late se cardine pandit,\nauratumque rubens demittit balteus ensem.\nTalis et ipse uirum gemina ad uestigia custos\ninsequitur, sic flammigero distinguitur astro\naetheriae Canis ille plagae, cui plurimus ardor\naestuat in mento, multus rubor imbuit ora.\nStridit anhelanti face pestifer, aera motu\ntorret, et immodici terras coquit ignibus astri.\nHic uarios ardet stellis rutilantibus artus,\nsed non est similis cunctis uigor, undique quippe\naluus coeanea est, mento grauis effluit ardor,\nqui formidato sub nomine Sirius aethram\nurit. Huic rutilos si Sol adflexerit axes,\nquantus corporibus, quantus labor imminet agris!","prev":{"citation":"Aratea 645-688","label":"Lines 645-688","url":"https://interlinea.aeterna-institute.org/library/latin/avienus/aratea/645","api":"https://interlinea.aeterna-institute.org/api/v1/library/latin/avienus/aratea/645"},"next":{"citation":"Aratea 736-779","label":"Lines 736-779","url":"https://interlinea.aeterna-institute.org/library/latin/avienus/aratea/736","api":"https://interlinea.aeterna-institute.org/api/v1/library/latin/avienus/aratea/736"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}