{"kind":"section","lang":"la","language":"Latin","title":"Aratea 736-779","citation":"Avienus, Aratea 736-779","ref":"736","level":null,"urn":null,"url":"https://interlinea.aeterna-institute.org/library/latin/avienus/aratea/736","api":"https://interlinea.aeterna-institute.org/api/v1/library/latin/avienus/aratea/736","markdown":"https://interlinea.aeterna-institute.org/library/latin/avienus/aratea/736.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":286,"text":"Marcebunt sata cuncta diu; namque indiga suci\nsiqua iacent, cedunt ualido penetrata calori,\nac decoctorum languebunt germina florum.\nIlla autem interno quae sunt animata uigore\nSirius attollit, blandusque illabitur herbas\nspiritus et dulci nutrit tepefacta sereno.\nHunc, hunc, flammanti cum primum uibrat ab ortu,\nauribus atque animo capimus procul. Altera siquae\nstellarum fuluo rutilant, quae plurima longi\nbelua fert lateris, neque multa luce coruscant\net designandis tantum sunt addita membris.\nParuulus in stellis Lepus est quoque; namque ubi magnus\nemicat Orion, gemina ad uestigia subter\nurgetur cursu rutili Canis. Ille per aethram\neffugit instantem, premit autem Sirius ore.\nAuritum primis emittit gurges ab undis,\nille minax pauidum super editur, et procul idem,\ncum Lepus occiduum sese inclinauit in aequor\nmore latebrarum repetens freta, Sirius alto\ndefluit ab caelo, mersumque per umida quaerit.\nMagnus Iasoniam cauda Canis extrahit Argo\npuppe refulgentem; neque enim se Thessala cumba\nsollemnem in faciem rostro mouet: extima puppis\nsurgunt Oceano. Velut alto a gurgite nautae\ncum portum tenuere, auidi uolitantia raptim\nsipara conuertunt, tergumque in curua remulco\nlitora certatim subdunt - simul illa, marinas\niam defuncta uias, procul imi litoris algas\npone subit terramque tenens secura quiescit -,\nsic Argo rutilam tantum inter sidera puppim\nducitur; occultat rigido tenus altera malo.\nSponte gubernaclum puppis demittit in undas\ncelsior ac merso descendit in aequora clauo.\nDistantem Andromedam prolixi tramite mundi\nperterret Cetos: nam Threicii prope flabra\nAndromedam Boreae celso rotat aethere cardo,\nbelua dira Noto uehitur, trahit Auster in atro\nora inimica salo. Nam qua se laniger alto\ncaelo Aries tollit, qua Piscibus astra duobus\naugentur, rutilat subter Nereia Pistrix,\nefflua praecurrens non multum Fluminis astra.\nIlla memor longae formidinis, illa dolorum\ninter signa tenax horret squalentia monstri\nterga procul, pauidumque super caput inserit undis.","prev":{"citation":"Aratea 689-735","label":"Lines 689-735","url":"https://interlinea.aeterna-institute.org/library/latin/avienus/aratea/689","api":"https://interlinea.aeterna-institute.org/api/v1/library/latin/avienus/aratea/689"},"next":{"citation":"Aratea 780-826","label":"Lines 780-826","url":"https://interlinea.aeterna-institute.org/library/latin/avienus/aratea/780","api":"https://interlinea.aeterna-institute.org/api/v1/library/latin/avienus/aratea/780"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}