{"kind":"section","lang":"la","language":"Latin","title":"Aratea 780-826","citation":"Avienus, Aratea 780-826","ref":"780","level":null,"urn":null,"url":"https://interlinea.aeterna-institute.org/library/latin/avienus/aratea/780","api":"https://interlinea.aeterna-institute.org/api/v1/library/latin/avienus/aratea/780","markdown":"https://interlinea.aeterna-institute.org/library/latin/avienus/aratea/780.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":293,"text":"Quin et caeruleo Flumen quoque gurgite manans\nastra inter sedesque deum pars aequoris esse\ncredidit Ausonii. Namque hunc dixere priores\nEridanum, Venetos late qui lapsus in agros\nAlpino Hadriacos impellit gurgite fluctus.\nHic fusum caelo quondam Phaethonta sub undas\nexcepit senior, leue cum sensere iugales\naetherii rectoris onus, cumque ignifer axis\ntramite sub mundi mortales spreuit habenas.\nDidita tum late texere incendia terras,\nastra uorax ignis, flammae sola cuncta coquebant,\ndonec fata sui miseratus Iuppiter orbis\nredderet aetherii Phoebo moderamina cursus.\nIllum prolixis durae Phaethontides ulnis\nplanxerunt, rediit supero pax aurea mundo,\nEridanumque senem nutu Iouis omniparentis\nastra receperunt. Pharium pars altera Nilum\ncommemorat, largo segetes quod nutriat amni\narentisque locos unda fecundet alumna,\nuel quod de medii prolapsus parte diei\nuastus in aequoreas pelagi sese inferat undas.\nIste pedem laeuum rutili subit Orionis,\nfusaque quae geminos adstringunt uincula Pisces\nEridani coeunt anfractibus. Vt procul ille\ntenditur effusi ui gurgitis, huc quoque cristae\ncedit apex, summa qua lux Pistrice coruscat\ndesuper et flamma caudarum cingula figit.\nInter demissum procul in uada caerula clauum\nPuppis Iasoniae depictaque terga carinae\net Pistrim undicolam, Leporis qua tenditur aluus,\nstellarum creber rutilat rubor. Haud tamen istis\nuel lux multa micat uel fit memorabile nomen.\nNulli etenim formae flammarum Iuppiter ignes\ndiscreuit, nullos simulant haec corporis artus,\nqualia digesto mundus sacer ordine uoluit,\nsemper in antiquum retrahens iter omnia secum\nsaeclorum serie. Longa istas denique signant\ninterualla faces, similis quoque lux habet omnis,\npar modus; occasu pariter referuntur et ortu,\nnec spectanda forent ponto quod sola carerent.\nCetera descriptis aptantur singula membris\nformarum; flagrans Leporem qua Sirius urget,\nlanguida nec certo sub nomine cuncta feruntur.\nVltra saetosi rursum speciem Capricorni,\ncardinis immersi qua sunt australia flabra,\nin Pistrim horrificam conuersus uiscera Piscis\nsubuehitur: Notium uocat istum Graecia Piscem.","prev":{"citation":"Aratea 736-779","label":"Lines 736-779","url":"https://interlinea.aeterna-institute.org/library/latin/avienus/aratea/736","api":"https://interlinea.aeterna-institute.org/api/v1/library/latin/avienus/aratea/736"},"next":{"citation":"Aratea 827-871","label":"Lines 827-871","url":"https://interlinea.aeterna-institute.org/library/latin/avienus/aratea/827","api":"https://interlinea.aeterna-institute.org/api/v1/library/latin/avienus/aratea/827"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}