{"kind":"section","lang":"la","language":"Latin","title":"Aratea 827-871","citation":"Avienus, Aratea 827-871","ref":"827","level":null,"urn":null,"url":"https://interlinea.aeterna-institute.org/library/latin/avienus/aratea/827","api":"https://interlinea.aeterna-institute.org/api/v1/library/latin/avienus/aratea/827","markdown":"https://interlinea.aeterna-institute.org/library/latin/avienus/aratea/827.md","author":{"name":"Avienus","url":"https://interlinea.aeterna-institute.org/library/latin/avienus"},"work":{"title":"Aratea","url":"https://interlinea.aeterna-institute.org/library/latin/avienus/aratea","urn":null},"verse":true,"words":286,"text":"Stellae aliae mundo, qua pulcher Aquarius instat\net qua cristato consurgit belua dorso\nusque sub aerii rutilantia sidera Piscis,\nsunt mediae, flammae steriles ac lucis egenae:\nnam passim ignoti uice uulgi semet in aethram\nprotollunt. Dextram sed tantum propter ephebi\npocula quem diuum mensis gestare loquuntur,\nefflua se species liquidarum fundit aquarum\npartis in geminas. Lux illic clara duabus\nest solum facibus; non haec spatiosa per aethram\ninterualla tenent neque lumina deuia fonte\ncollidunt: alii Phrygium nam subter ephebum\nardet apex, alii, qua curuam belua caudam\nterminat, insignis late uomitur globus ignis.\nCunctis nomen Aqua est. Quin stellae denique propter\ncrura Sagittigeri, qua se uestigia prima\ncornipedis simulant, circumuoluuntur Olympo,\nquis face sub tenui tenebrosus marceat ignis.\nEcce uenenatae qua Scorpius agmine caudae\nplurimus erigitur tepidumque super micat Austrum,\nparuulus hic Aram locus exprimit, hanc satis arto\ntempore suspicies mundo rutilante referri.\nNam polus aduerso qui tollitur axe Bootis,\nquantum suspenso uada linquit turbida caelo,\nOceano tantum sibimet contraria condit:\nArcturum uertex leuat arduus, umbrifer Austri\nAram cardo premit. Breuis olli semita caeli\noccasusque celer; tamen isto luciparens Nox,\nfata hominum miserata prius, miserata labores,\ncerta procellarum statuit procedere signa.\nNe tibi, cum denso conducitur aere caelum,\ninter nimbiferas nubes spectabilis exstet\nAra poli, longa ut glomerent circumque supraque\nfeta pruinarum se uellera, qualia tristi\ncoguntur uento terraque excita per aethram\nnubila conceptos effundunt desuper imbres!\nNon Arae, non sit tali sub tempore uertex\nclarior! Hoc nam saepe Notum praenoscere signo\nNox docuit. Noctis siquis praecepta sequatur,\nincassum Zephyri uoluunt mare; siquis at ista\nrespuat, incautas percellent flabra carinas.\nVix, sis sera Iouem subeat miseratio rerum,\nPigra salus nautis redeat fluitantibus alto.\nCertior ast ollis ueniet spes, axe supremo\nsi Boreae stringat rutili coma fulgoris auras.","prev":{"citation":"Aratea 780-826","label":"Lines 780-826","url":"https://interlinea.aeterna-institute.org/library/latin/avienus/aratea/780","api":"https://interlinea.aeterna-institute.org/api/v1/library/latin/avienus/aratea/780"},"next":{"citation":"Aratea 872-915","label":"Lines 872-915","url":"https://interlinea.aeterna-institute.org/library/latin/avienus/aratea/872","api":"https://interlinea.aeterna-institute.org/api/v1/library/latin/avienus/aratea/872"},"credit":{"text":"Avienus, Aratea. Text: Musisque Deoque, CC BY-SA 4.0. Changes: markup removed and the text divided into reading sections by Interlinea.","license":"CC BY-SA 4.0","licenseUrl":"https://creativecommons.org/licenses/by-sa/4.0/","source":"https://www.mqdq.it/testo/testo/codice/AVIEN%7Carat%7C001","quality":"proofread"}}